আন্ত:ৰাষ্ট্ৰীয় সীমান্তৰ সুৰক্ষা চৰকাৰৰ সবাতোকৈ প্ৰথম অগ্ৰাধিকাৰ বুলি উল্লেখ কৰি কেন্দ্ৰীয় গৃহমন্ত্ৰী ৰাজনাথ সিঙে বৃহস্পতিবাৰে কয় যে এক বহুস্তৰীয় ‘’সীমান্ত সুৰক্ষা বেৰ’’ দেশৰ গোটেই সীমান্ত জুৰি স্থাপন কৰা হ’ব।
‘’পাঁচখন ৰাজ্য সামৰি ভাৰত-বাংলা সীমান্তৰ মুঠ দৈৰ্ঘ হৈছে ৪,০৯৬ কিলোমিটাৰ যাৰ ভিতৰত ৩,০০৬ কিলোমিটাৰত ইতিমধ্যে বেৰ স্থাপন কৰা হৈছে। কিন্তু বাকী ১,০৯০ কিলোমিটাৰ সীমান্তত এতিয়া বেৰ দিবলৈ বাকী আছে। আমি এই অঞ্চলসমূহত প্ৰযুক্তিগত ব্যৱস্থা ৰূপায়ন কৰাৰ সিদ্ধান্ত গ্ৰহণ কৰিছো যিবোৰক কোৱা হ’ব নন ফিজিকেল বেৰিয়াৰ,’’ –বাংলাদেশৰ সৈতে সীমান্ত ভগাই লোৱা ৰাজ্যসমূহৰ মুখ্যমন্ত্ৰীসকলৰ সৈতে কলকাতাত ভাৰত-বাংলা সীমান্তৰ সুৰক্ষাৰ বিভিন্ন দিশ সম্পৰ্কে আলোচনা কৰিবলৈ অনুষ্ঠিত হোৱা বৈঠকৰ অন্তত ৰাজনাথ সিঙে এই মন্তব্য কৰে।
‘’ বেৰ নোহোৱা অঞ্চলসমূহৰ ৬৮৪ কিলোমিটাৰ বেৰ আৰু আনুষংগিক আন্ত:গাঁথনিৰে সুৰক্ষিত কৰা হ’ব। বাকী বেৰ দিবলৈ সম্ভৱ নোহোৱা ৪০৬ কিলোমিটাৰ সীমান্ত অঞ্চল নন্ ফিজিকেল বেৰিয়াৰ ব্যৱস্থাৰ অধীনত সুৰক্ষিত কৰা হ’ব,’’- তেওঁ কয়। এই প্ৰসংগতে তেওঁ উল্লেখ কৰে যে নন্ ফিজিকেল বেৰিয়াৰ ব্যৱস্থা প্ৰথমতে ৰূপায়ন কৰা হ’ব অসমৰ ধুবুৰী সীমান্ত খণ্ডত।
গৃহমন্ত্ৰীগৰাকীয়ে কয় যে বেৰ দি বা নন্ ফিজিকেল বেৰিয়াৰৰ দ্বাৰা সীমান্ত সুৰক্ষিত কৰাৰ উপৰিও গোটেই ভাৰত-বাংলা সীমান্ত সম্পূৰ্ণ সুৰক্ষা ব্যৱস্থাৰে এক ‘’সীমান্ত সুৰক্ষা বেৰ’’ৰ অধীনত অনা হ’ব।
‘’ এই সুৰক্ষা বেৰ’ ত কাঁটাতাৰ আৰু নন্ ফিজিকেল বেৰিয়াৰ, নিৰীক্ষণ ব্যৱস্থা, চোৰাংচোৱা সংস্থা, ৰাজ্যিক আৰক্ষী, সীমান্ত সুৰক্ষা বাহিনীকে ধৰি ৰাজ্যিক আৰু কেন্দ্ৰীয় আন সংস্থাৰ বিভিন্ন গোটসমূহ সংযুক্ত হ’ব।‘’ তেওঁ জনায় যে সীমান্ত সুৰক্ষা বেৰৰ ৰূপায়নৰ কাম কাজ পৰ্যবেক্ষন কৰিব সংশ্লিষ্ট ৰাজ্যৰ মুখ্য সচিবগৰাকীয়ে।
সীমান্ত অঞ্চলত বাস কৰা লোকসকলক দেশৰ কৌশলগত সম্পদ বুলি উল্লেখ কৰি গৃহমন্ত্ৰী গৰাকীয়ে কয় যে এই চৰকাৰৰ সুৰক্ষাৰ বিষয়টো মুখ্য প্ৰাথমিকতা হিচাপে সীমান্ত অঞ্চলৰ ক্ষিপ্ৰ বিকাশ অনা হ’ব।
তেওঁ কয় যে সীমান্তৰে গৰুৰ চোৰাংবেহা, মানব সৰবৰাহ, সীমান্তৰে অস্ত্ৰৰ চোৰাং সৰবৰাহ,দ্ৰাগছ আৰু ভাৰতীয় জাল নোট ৰ বিষয়ে বৈঠকত দীঘলীয়া আলোচনা কৰা হয় আৰু সংশ্লিষ্ট ৰাজ্যসমূহক এই বিষয়ত তীক্ষ্ন দৃষ্টি ৰখাৰ বাবে আহ্বান জনায়।
‘’আমি বাংলাদেশৰ সৈতে বন্ধুত্বপূৰ্ণ সম্পৰ্ক ৰক্ষা কৰিছো, কিন্তু সুৰক্ষাৰ পৰিৱেশ এটা বাস্তৱ সমস্যা। লগতে গোটেই সীমান্ত বন্ধ নকৰাটো এটা সমস্যা। সন্ত্ৰাসবাদী সংগঠনসমূহে চুবুৰীয়া বাংলাদেশৰ ভূমিৰ অপব্যৱহাৰ কৰিব পাৰে। সেইবাবেই আমি তীক্ষ্ন দৃষ্টি ৰাখিব লাগিব।
উত্তৰ –পূবৰ উগ্ৰপন্থী সংগঠনসমূহৰ অধিকাংশই নিয়ন্ত্ৰণলৈ আহিছে বুলি দাবী কৰি ৰাজনাথ সিঙে কয় যে চৰকাৰে চুবুৰীয়া দেশত আশ্ৰয় লোৱা উগ্ৰপন্থী গোটসমূহৰ ওপৰত দৃষ্টি ৰাখিছে।
