সদৌ ছিকিম অনুসূচিত জাতি কল্যাণ সংস্থাই প্ৰথমবাৰৰ বাবে ৰাজ্যত আয়োজন কৰা ড০ বি আৰ আম্বেদকাৰ ফুটবল প্ৰতিযোগিতাখন মঙলবাৰে গেংটকৰ পালজৰ ষ্টেডিয়ামত এক বৰ্ণাঢ্য কাৰ্যসূচীৰ মাজেৰে শুভাৰম্ভণি হয়।
সমাজ কল্যাণ বিভাগৰ সহযোগত আয়োজন কৰা ফুটবল প্ৰতিযোগিতাখন শুভাৰম্ভ কৰে ৰাজ্যখনৰ মানৱ সম্পদ উন্নয়ন মন্ত্ৰী আৰ বি চুব্বাই।
গেংটকত এনেধৰণৰ ফুটবল প্ৰতিযোগিতা অনুষ্ঠিত কৰাত মন্ত্ৰীগৰাকীয়ে আয়োজক সমিতিক বিশেষভাবে ধন্যবাদ জ্ঞাপন কৰে। তেওঁ লগতে ৰাজ্যৰ শিক্ষক-শিক্ষয়ত্ৰী সকলক ক্ৰীড়াৰ উন্নয়নৰ বাবে বিশেষ ব্যৱস্থা গ্ৰহণ কৰিবলৈ আহ্বান জনোৱাৰ লগতে ছাত্ৰ-ছাত্ৰীসকলক ফুটবল খেলত নিজকে মনোনিৱেশ কৰিবলৈ অনুৰোধ জনায়।
প্ৰতিযোগিতাখনৰ আয়োজক সমিতিৰ অধ্যক্ষ এছ বেৰেইলীয়ে কয় যে ড০ বি আৰ আম্বেদকাৰৰ জন্মবাৰ্ষিকী প্ৰত্যেক বছৰে গেংটকত আয়োজন কৰা হয় যদিও এইবাৰ খেলৰ মাধ্যমেৰে ৰাজ্যখনৰ যুৱ সমাজক একত্ৰিত কৰাৰ উদ্দেশ্যেৰে এই প্ৰতিযোগিতাখন আয়োজন কৰা হৈছে।
এই বছৰৰ পৰা প্ৰত্যেক বৰ্ষতে প্ৰতিযোগিতাখন আয়োজন কৰাৰ কথা জানিবলৈ দি আয়োজকে কয় যে এইবাৰৰ নকআউট পৰ্যায়ৰ খেলসমূহ ৯ এপ্ৰিললৈ চলিব আৰু প্ৰতিযোগিতাখনৰ চূড়ান্ত খেলখন অহা ১৪ এপ্ৰিলত অনুষ্ঠিত হ’ব।
আনহাতে প্ৰতিযোগিতাখনৰ চূড়ান্ত খেলখনত মুখ্য অতিথি হিচাপে ৰাজ্যখনৰ মুখ্য মন্ত্ৰী পৱন চামলিং, কমল থাতালৰ লগতে ৰাষ্ট্ৰীয় পৰ্যায়ৰ আগশাৰীৰ বহু ফুটবলাৰ উপস্থিত থাকিব বুলি আয়োজক সংস্থাই জানিবলৈ দিয়ে।
উল্লেখ্য যে প্ৰথমবাৰৰ বাবে আয়োজন কৰা প্ৰতিযোগিতাখনত ছিকিমৰ লগতে পাৰ্শ্বৱৰ্তী অঞ্চলৰ মুঠ ১৪ টা দলে অংশগ্ৰহণ কৰিব আৰু বিজয়ী দলে নগদ এক লাখ আৰু বিজীত দলটোৱে লাভ কৰিব নগদ ৭০ হেজাৰ টকা।
আনহাতে প্ৰতিযোগিতাখনৰ উদ্বোধনী অনুষ্ঠানত স্থানীয় বিধায়ক পিণ্টছো চপেল ভূটীয়া, অতিৰিক্ত আৰক্ষী সঞ্চালক প্ৰধান অক্ষয় চাছডেৱা, গেংটক পৌৰ নিগমৰ অধ্যক্ষ আশীষ ৰয়ৰ লগতে বিভিন্ন বিদ্যালয়ৰ পৰা অহা ছাত্ৰ-ছাত্ৰীসকল উপস্থিত থাকে।
