ৰাজ্যত চলি থকা চিণ্ডিকেটৰাজৰ ওপৰত আজি কৃষক মুক্তি সংগ্ৰাম সমিতিয়ে আয়োজন কৰা সংবাদমেলত কৃষক নেতা অখিল গগৈ সৰৱ হৈ পৰা পৰিলক্ষিত হয়।
কালি আৰক্ষী আয়ুক্ত হীৰেন নাথে গুৱাহাটীত কয়লা চিণ্ডিকেট চলি থকা নাই বুলি কৰা মন্তব্যক কেন্দ্ৰ কৰি অখিল গগৈয়ে কয় যে ১৯ জানুৱাৰীৰ দিনা মুখ্য মন্ত্ৰী সৰ্বানন্দ সোণোৱালৰ আইন উপদেষ্টা শান্তনু ভড়ালীয়ে আৰক্ষী আয়ুক্ত হীৰেন নাথকে কাষত বহুৱাই মহানগৰীত কয়লা চিণ্ডিকেট চলি থকা বুলি উল্লেখ কৰিছিল। লগতে তেওঁ গুৱাহাটীত ১৮ খন ট্ৰাক জব্দ আৰু এই চিণ্ডিকেটৰ সৈতে জড়িত ৮ জনকৈ লোকক গ্ৰেপ্তাৰ কৰা হৈছিল বুলি উল্লেখ কৰিছিল। এনে পৰিপ্ৰেক্ষিতত কালি আৰক্ষী আয়ুক্ত গৰাকীয়ে কৰা মন্তব্য অৰ্থহীন বুলি কৃষক নেতাজনে সদৰী কৰে। মাত্ৰ ৫ দিনৰ ব্যৱধানত হীৰেণ নাথে মহানগৰীত চিণ্ডিকেট নথকা বুলি কৈ কিহৰ বাবে চিণ্ডিকেট চক্ৰৰ হৈ ওকালতি কৰিছে বুলি কৃষক নেতাজনে প্ৰশ্ন উত্থাপন কৰে। এই ক্ষেত্ৰত হীৰেন নাথে মুখ্যমন্ত্ৰীৰ নিৰ্দেশ মৰ্মে এই মন্তব্য প্ৰদান কৰিছে নে নিজে কয়লা চিণ্ডিকেটৰ সৈতে জড়িত হৈ পৰিছে সেই কথা স্পষ্ট কৰাৰ বাবে অখিল গগৈয়ে দাবী জনায়। তদুপৰি হীৰেন নাথে কৰা মন্তব্যৰ ওপৰত ভিত্তি কৰি তদন্তৰ দাবী কৰে কৃষক নেতাজনে।
ইয়াৰ উপৰি যোৱা ২০ জানুৱাৰীৰ দিনা কয়লা চিণ্ডিকেটৰ বিৰুদ্ধে বশিষ্ঠ আৰক্ষী থানাত এক গোচৰ ৰুজু কৰিছিল। কিন্তু বৰ্তমান পৰ্যন্ত গোচৰটো পঞ্জীয়ন কৰা হোৱা নাই বুলি বুলি কৃষক নেতাজনে এক অভিযোগ আনে। এই ক্ষেত্ৰত তেওঁ স্পষ্ট ৰূপত উল্লেখ কৰে যে বশিষ্ঠ থানাৰ ভাৰপ্ৰাপ্ত আৰক্ষী বিষয়ালৈ কালি কৃষক নেতাজনে ফোনযোগে গোচৰটো পঞ্জীয়ন হৈছেনে নাই সোধাত আৰক্ষী বিষয়াজনে নাই হোৱা বুলি কয়। লগতে কিহৰ বাবে এই গোচৰটো পঞ্জীয়ন কৰা হোৱা নাই বুলি কৃষক নেতাজনে কৰা প্ৰশ্নৰ উত্তৰত আৰক্ষী বিষয়াজনে উচ্চতম ন্যায়ালয়ৰ নিৰ্দেশ অনুসৰি তেওঁলোকে এটা গোচৰ এসপ্তাহ পৰ্যন্ত পঞ্জীয়ন নকৰাকৈ থাকিব পাৰে বুলি কয়। ইয়াৰ উপৰি এই গোচৰটো পঞ্জীয়ন কৰা নহ’ব বুলি অখিল গগৈলৈ এক জাননী প্ৰেৰণ কৰা হ’ব বুলি আৰক্ষী বিষয়াজনে জানিবলৈ দিয়া বুলি আজিৰ সংবাদমেলত কৃষক নেতাজনে সদৰী কৰে। এই কথা গগৈয়ে মুখ্যমন্ত্ৰীৰ আইন উপদেষ্টা শান্তনু ভড়ালীক অৱগত কৰাৰ পিছত তেওঁ গোচৰটো পঞ্জীয়ন কৰাৰ আশ্বাস প্ৰদান কৰে বুলি জানিবলৈ দিয়ে।
তদুপৰি কৃষক নেতাজনে চৰকাৰৰ ছত্ৰছায়াত কিছুসংখ্যক দুষ্ট চক্ৰই অবাধে তথা নিৰ্ভয়ে এই কয়লা চিণ্ডিকেট চলাই নিয়া বুলি এক অভিযোগ তোলে। মহানগৰীৰ সমান্তৰালকৈ ৰাজ্যৰ বিভিন্ন প্ৰান্তত চিণ্ডিকেটৰাজ চলি থকা বুলি দাবী কৰে কৃষক নেতাজনে। এই ক্ষেত্ৰত উদাহৰণ হিচাপে কিছুদিন পূৰ্বে কাছাৰত জব্দ হোৱা ২১৮ খন ট্ৰাকৰ কথা উল্লেখ কৰে। এই জব্দ কৰা ট্ৰাক সমূহৰ পৰা ৪০ লাখ টকা প্ৰশাসনে আদায় কৰাৰ এক অভিযোগ আনে নেতাজনে।
উল্লেখযোগ্য যে আজিৰ এই সংবাদমেলত বিজেপিৰ মাৰ্ঘেৰিটা সমষ্টিৰ বিধায়ক ভাস্কৰ শৰ্মাৰ নেতৃত্বত মাৰ্ঘেৰিটাত কয়লা চিণ্ডিকেট চলি থকা বুলি কৃষক নেতা অখিল গগৈয়ে স্পষ্টৰূপত উল্লেখ কৰে।
আনহাতে প্ৰতিবেগ চিমেন্টৰ ৭ টকাকৈ মূল্যবৃদ্ধিৰ আঁৰত চিণ্ডিকেটৰাজ জড়িত থকা বুলিও কৃষক নেতাজনে মন্তব্য কৰে। নিৰ্ধাৰিত পৰিমাণতকৈ অধিক বোজা কঢ়িওৱা চিমেন্ট ভৰ্ত্তি ট্ৰাকসমূহ জব্দ হোৱা বাবে চিমেন্ট কোম্পানীয়ে চিমেন্টৰ মূল্য বৃদ্ধি কৰা বুলি তেওঁ উল্লেখ কৰে।
