আৰক্ষীয়ে চূড়ান্ত দায়িত্বহীনতাৰ নিদৰ্শনেৰে কালি মহানগৰীৰ ভূতনাথ শ্মশানৰ দাঁতিৰে বৈ যোৱা বৰলুইতৰ পানীত ওপঙি থকা ৭টাকৈ মৃতদেহ উদ্ধাৰ কৰি সঠিক অনুসন্ধান নকৰাকৈ আৰু উপযুক্ত নিয়ম অনুসৰণ নকৰাকৈ পুতি থোৱাত প্ৰতিক্ৰিয়াৰ সৃষ্টি হৈছে।
উল্লেখযোগ্য যে কালি অৰ্থাৎ ১৭ এপ্ৰিলত প্ৰায় ২.৩০ বজাত ভূতনাথ শ্মশান কৰ্তৃপক্ষই ইয়াৰ দাঁতিৰ লুইতৰ পানীত সাতটাকৈ মৃতদেহ ওপঙি থকা দেখা পাই আৰক্ষীক খবৰ দিছিল। খবৰ পায়ে ভৰলু থানাই নদী আৰক্ষীৰ সহযোগত মৃতদেহকেইটা উদ্ধাৰ কৰে। কিন্তু মৃতদেহকেইটা ক’ৰ পৰা কেনেকৈ ওপঙি আহিছিল বা সেইবোৰৰ পৰিচয় সন্দৰ্ভত ভালকৈ অনুসন্ধান নকৰাকৈ মৃতদেহকেইটা ভূতনাথ শ্মশানৰ পিছপিনে পুতি থয়।
আৰক্ষীৰ এনে কাৰ্য্যত স্থানীয় ৰাইজ আৰু আইন সচতেন লোকৰ মাজত তীব্ৰ প্ৰতিক্ৰিয়া হৈছে। আইনবিদ সকলৰ মতে কোনো অচিনাক্ত মৃতদেহ উদ্ধাৰ হ’লে তাক চিনাক্ত কৰাটো প্ৰাথমিক দায়িত্ব আৰু ই আইনী প্ৰক্ৰিয়াৰ অংশ। ৭২ ঘণ্টাৰ ভিতৰতো চিনাক্ত নহ’লে দণ্ডাধীশৰ উপস্থিতিত আৰক্ষীয়ে মৃতদেহ সৎকাৰ কৰে।
কিন্তু ভৰলুৰ আৰক্ষীয়ে উক্ত মৃতদেহকেইটাৰ ক্ষেত্ৰত এই আইনী প্ৰক্ৰিয়া অনুসৰণ নকৰি, অনুমানৰ ভিত্তিত সেইকেইটা ভূতনাথ শ্মশানৰ পৰাই ব্ৰহ্মপুত্ৰৰ বাঢ়নী পানীয়ে উটুৱাই নিয়া বুলি দাবী কৰি ভূতনাথ শ্মশানৰ পিছফালে পুতি থয়।
আৰক্ষীৰ এই কাণ্ডত সচেতন ৰাইজে প্ৰশ্ন কৰিছে যে একে সময়তে একেটা স্থানতে শিশু আৰু বয়স্ক লোকৰ ৭টাকৈ অৰ্ধগলিত মৃতদেহ উদ্ধাৰ হোৱাৰ পিছতো আৰক্ষীয়ে কেনেকৈ ইমান সাধাৰণভাৱে বিষয়টো ল’ব পাৰিলে? আৰক্ষী কিহৰ ভিত্তিত নিশ্চিত হ’ল যে এই আটাইবোৰ মৃতদেহেই পূৰ্বে পুতি থোৱা অচিনাক্ত মৃতদেহ বুলি?
আৰু যদিহে মৃতদেহকেইটা ভূতনাথ শ্মশানৰ পৰাই পানীয়ে উটুৱাই আনিছে, তেন্তে শ্মশানখনত মৃতদেহ সৎকাৰৰ ক্ষেত্ৰত হোৱা গাফিলতি আৰু দায়িত্বহীনতা প্ৰমাণ হোৱা নাইনে? মৃতদেহ সৎকাৰৰ ক্ষেত্ৰত নিম্নতম মানৱীয় দায়িত্ব তথা মৃতদেহৰ প্ৰতি ন্যূনতম সন্মান প্ৰদৰ্শন কৰা হয়নে?