অসমৰ শিক্ষা বিভাগ এই বছৰ এটা ব্যতিক্ৰমী সফলতাৰ মুখ দেখিবলৈ সক্ষম হৈছে। প্ৰতিবছৰৰ শিক্ষাবৰ্ষৰ আৰম্ভণিতেই ৰাজ্যৰ চৰকাৰী বিদ্যালয়বোৰৰ অভিভাৱক তথা শিক্ষাৰ্থীসকলৰ মাজত বিনামূলীয়া পাঠ্যপুথি পোৱাৰ বাবে এক অনিশ্চয়তা ওলমি থাকিছিল। বছৰ বছৰ জুৰি শিক্ষা বিভাগৰ ওপৰত এইটো এটা স্বাভাৱিক অভিযোগ আছিল।
কিন্তু শিক্ষা বিভাগৰ পৰা দিয়া এটা তথ্যৰ পৰা জানিব পৰা গৈছে যে এইবাৰ সেই অপবাদৰ পৰা শিক্ষা বিভাগে নিজকে মুক্ত কৰিবলৈ সক্ষম হ’ল। সূত্ৰটোৱে কয় যে এইবাৰ শিক্ষাবৰ্ষ আৰম্ভ হোৱাৰ পূৰ্বেই সকলো বিদ্যালয়লৈ তেওঁলোকৰ ছাত্ৰ-ছাত্ৰীৰ অনুপাতে সম্পূৰ্ণকৈ পাঠ্যপুথি পঠোৱা কাম ইতিমধ্যে শেষ হৈছে।
উল্লেখযোগ্য যে যোৱা বছৰেই শিক্ষা মন্ত্ৰী হিমন্ত বিশ্ব শৰ্মাই ঘোষণা কৰিছিল যে ২০১৮ শিক্ষাবৰ্ষ আৰম্ভ হোৱাৰ লগে লগে ছাত্ৰ-ছাত্ৰীসকলক বিনামূলীয়া পাঠ্যপুথি যোগান ধৰা হ’ব।
সূত্ৰটোৱে জনোৱা মতে ‘ক’ শ্ৰেণীৰ পৰা দশম শ্ৰেণীলৈ শিক্ষা বিভাগে মুঠ ৩,৩২,৯০,৫০০খন কিতাপ বিতৰণ কৰি প্ৰথমবাৰৰ বাবে কোনোধৰণৰ আসোঁৱাহ নোহোৱাকৈ বিনামূলীয়া পাঠ্যপুথি বিতৰণ সম্পন্ন কৰিলে।
ইয়াৰে প্ৰাথমিক শাখাত(‘ক’ শ্ৰেণীৰ পৰা পঞ্চম শ্ৰেণীলৈ)মুঠ ১,১৫,৫৫,১০০খন কিতাপ, উচ্চ প্ৰাথমিক শাখাত(ষষ্ঠ শ্ৰেণীৰ পৰা দশম শ্ৰেণীলৈ) ৯৭,৬১,৮০০খন আৰু মাধ্যমিক শাখাত নৱম শ্ৰেণীৰ পৰা দশম শ্ৰেণীলৈ ৯২,১৭,৫০০খন কিতাপ বিতৰণ কৰা হয় বুলি সূত্ৰটোৱে জনাইছে।
এই প্ৰক্ৰিয়াটোত শিক্ষা বিভাগে মুঠ ১১১.৯৮ কোটি টকা ব্যয় কৰিছে। অসম ৰাজ্যিক পাঠ্যপুথি প্ৰণয়ন আৰু প্ৰকাশন নিগমৰ জৰিয়তে বিতৰণ কৰা এই বিনামূলীয়া পাঠ্যপুথি মুঠ ১৭টা ভাষাত ছপোৱা হৈছে।
আনহাতে শিক্ষা বিভাগে জানিবলৈ দিয়া মতে অহা ১১ জানুৱাৰীত শিক্ষা মন্ত্ৰী ড০ হিমন্ত বিশ্ব শৰ্মাই এক অনুষ্ঠানত বিনামূলীয়া পাঠ্যপুথি লাভ কৰা ছাত্ৰ-ছাত্ৰীসকলক অভিনন্দন জ্ঞাপন কৰিব।