শিলচৰত সোমবাৰে এগৰাকী বৃদ্ধই এন আৰ চি সংক্ৰান্তিয় বিভ্ৰাটৰ বাবে মানসিক চাপত ভূগি আত্মহত্যাৰ পথ বাচি লয়। আত্মহত্যাৰ পথ বাচি লোৱা ৬০ বছৰীয়া বৃদ্ধা গৰাকী বিজিত সেন বুলি চিনাক্ত কৰা হৈছে।
প্ৰাপ্ত তথ্য মতে শিলচৰৰ ৰাষ্ট্ৰীয় ঘাইপথৰ সমীপৰ নিৱাসী বিজিত সেনে এন আৰ চিৰ খচৰাত নিজৰ পত্নীৰ নাম অন্তৰ্ভুক্ত কৰাৰ ক্ষেত্ৰত অসুৰক্ষিত অনুভৱ কৰি আত্মহত্যাৰ দৰে পথ বাচি লয়।
আনহাতে ৩১ ডিচেম্বৰৰ নিশা প্ৰকাশিত এন আৰ চিৰ প্ৰথম খচৰাত বিজিত সেনৰ নাম অন্তৰ্ভুক্ত আছিল যদিও সেনৰ পত্নীৰ নাম এন আৰ চিৰ প্ৰথম খচৰাৰ পৰা বাদ পৰি ৰৈছিল। ফলত সেনৰ পত্নীৰ নাম এন আৰ চিৰ দ্বিতীয় খচৰাত অন্তৰ্ভুক্ত হ’ব নে নাই সেই লৈ চিন্তা কৰি মানসিকভাৱে ভাগি পৰিছিল। অৱশেষত সেনে আত্মহত্যাৰ দৰে পথ বাচি ল’বলৈ বাধ্য হয়।
উল্লেখযোগ্য যে এন আৰ চিত নাম অন্তৰ্ভুক্ত নোহোৱাৰ বাবে অাত্মহত্যা কৰা ঘটনা ৰাজ্যখনত এইটোৱেই প্ৰথম নহয়। ইয়াৰ পূৰ্বে আক্ৰাম উদ্দিন বৰভূঞা নামৰ এজন ব্যক্তিয়ে এন আৰ চিৰ নিৰীক্ষণৰ বাবে নথি-পত্ৰ যোগাৰ কৰিব নোৱাৰি আত্মহত্যা কৰাৰ বিপৰীতে গোৱালপাৰাত আনোৱাৰ হুছেইন নামৰ এজন ব্যক্তিয়ে নিজৰ জীয়েকৰ এন আৰ চিৰ নথি-পত্ৰ পুনৰ নিৰীক্ষণৰ বাবে জাননী লাভ কৰাৰ বাবে আত্মহত্যা কৰিছিল।
