প্ৰযুক্তি নগৰী স্থাপনেৰে ৰাজ্যখনৰ বিজ্ঞান আৰু প্ৰযুক্তিৰ ক্ষেত্ৰখনক নতুন মাত্ৰা দিবলৈ ওলাইছে ৰাজ্য চৰকাৰ। গুৱাহাটী মহানগৰীৰ পাৰ্শ্বৱৰ্তী এলেকা বৰঝাৰৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰৰ কাষত এই প্ৰযুক্তি নগৰী স্থাপন হ’ব বুলি জানিবলৈ দিছে প্ৰযুক্তি আৰু তথ্য প্ৰযুক্তি মন্ত্ৰী কেশৱ মহন্তই। মন্ত্ৰীজনে জনোৱা মতে এই প্ৰযুক্তি নগৰীৰ বাবে চৰকাৰে ৩০০ বিঘা মাটি ঠিক কৰিছে। প্ৰায় ১২৯ কোটিৰ খৰচেৰে এই নগৰী স্থাপন কৰিবলৈ লোৱা হৈছে বুলি মন্ত্ৰীজনে জানিবলৈ দি কয় যে ইয়াৰ বাবে কেন্দ্ৰীয় চৰকাৰে ৫০ কোটি টকা অনুমোদন দিছে। বাকীখিনি খৰচ ৰাজ্য চৰকাৰে বহন কৰাৰ কথা।
আনহাতে তেওঁ জনাইছে যে ইয়াত এটা তিনি মহলীয়া বিল্ডিং হ’ব, য’ত থাকিব তথ্য-প্ৰযুক্তি সঞ্চালকালয়ৰ কাৰ্য্যালয়।
‘প্ৰযুক্তি নগৰীখন হ’ব বিজ্ঞান আৰু প্ৰযুক্তিৰ প্ৰতি থকা আমাৰ দায়বদ্ধতাৰ এটা নমুনা। ই ৰাজ্যখনৰ ব্যাৱসায়িক সম্ভাৱনাবোৰৰ বাট মুকলি কৰিব। বিশ্ব বিনিয়োগ মেলাৰ ঠিক দুদিন পূৰ্বে এই প্ৰযুক্তি নগৰীখনৰ আধাৰশিলা স্থাপনক এক গুৰুত্বপূৰ্ণ অগ্ৰগতি বুলি ধৰিব পাৰি।’ মন্ত্ৰী কেশৱ মহন্তই কয়।
উল্লেখযোগ্য যে এই প্ৰযুক্তি নগৰীৰ আধাৰশিলা অহা ১ ফেব্ৰুৱাৰিত স্থাপন কৰিব মুখ্য মন্ত্ৰী সৰ্বানন্দ সোণোৱালে। মুখ্য মন্ত্ৰীজনে এই সন্দৰ্ভত কয় যে তথ্য-প্ৰযুক্তি সঞ্চালকালয় মুকলি কৰাটোৱে চৰকাৰক তথ্য-প্ৰযুক্তিৰ ব্যৱহাৰ কৰি নিকা প্ৰশাসন তথা সুপ্ৰশাসন দিব পৰা যাব।
