১৩৮ সংখ্যক ঐতিহাসিক ঘোঁৰা দৌৰ প্ৰতিযোগিতাখন অহা ২৩ ফেব্ৰুৱাৰিৰ পৰা যোৰহাটৰ ঐতিহাসিক জিমখানা ক্লাব গ্ৰাউণ্ডত অনুষ্ঠিত হ’ব। তিনিদিনীয়াকৈ অনুষ্ঠিত হ’ব লগা এই প্ৰতিযোগিতাখনৰ বাবে আয়োজক জিমখানা ক্লাবে প্ৰস্তুতি প্ৰায় সম্পূৰ্ণ কৰি তুলিছে।
উল্লেখ্যযোগ্য যে ব্ৰিটিছ আমোলতে ইংৰাজসকলে মনোৰঞ্জনৰ আহিলা হিচাপে আৰম্ভ কৰা প্ৰতিযোগিতাখন বৰ্তমানো এক পৰম্পৰা হিচাপেই জিমখানা ক্লাবে আয়োজন কৰি আহিছে।
লক্ষণীয় যে দেশৰ লগতে দেশৰ বাহিৰতো পূৰ্বৰে পৰা ঘোঁৰা দৌৰ প্ৰতিযোগিতা চলি থকা নজিৰ আছে যদিও যোৰহাট ৰেচৰ এক সুকীয়া মৰ্যাদা আছে কাৰণ ৰেচৰ সময়ত ইয়াৰ জকীয়ে জিন ব্যৱহাৰ নকৰে। যাৰ ফলত এই ব্যক্তিক্ৰমী পৰম্পৰাৰ বাবে কেৱল থলুৱা ঘোঁৰাই এই ৰেচত ভাগ লোৱা সত্ত্বেও আজিও যোৰহাট ৰেচে দেশী-বিদেশী পৰ্যটকক আকৰ্ষণ কৰি আহিছে।
আনহাতে এই প্ৰতিযোগিতাখনৰ আন এক উল্লেখনীয় দিশ হৈছে স্থানীয় মিচিং সম্প্ৰদায়ৰ ভূমিকা।
লক্ষণীয় যে ইংৰাজৰ দিনৰ পৰাই প্ৰতিযোগিতাখনৰ সৈতে সৃংপৃক্ত হৈ পৰা অবিভক্ত শিৱসাগৰ জিলাৰ মিচিং সম্প্ৰদায়ৰ লোকসকলে আজিও এই প্ৰতিযোগিতাত গুৰুত্বপূৰ্ণ ভূমিকা গ্ৰহণ কৰি আহিছে।
আয়োজক সমিতিয়ে জনোৱা মতে এইবাৰৰ প্ৰতিযোগিতাত জাঁজীমুখ, মালৌখাত আৰু কপাহতলী অঞ্চলৰ শতাধিক ঘোঁৰাই ভাগ ল’ব।
প্ৰতিযোগিতাখনত ২৩ আৰু ২৫ ফেব্ৰুৱাৰিত ঘোঁৰা ৰেচ হোৱাৰ বিপৰীতে ২৪ ফেব্ৰুৱাৰিত কাৰ ৰেলীৰ লগতে আছাম ৰাইফলছৰ ডগ ইউনিটে ডগ শ্ব’ প্ৰদৰ্শন কৰিব।
ইফালে, প্ৰতিদিনে ১০টাকৈ ৰেচ হ’ব লগা প্ৰতিযোগিতাৰ বিজয়ী ঘোঁৰাৰ গৰাকীক ৮ হাজাৰ আৰু বিজেতাক ৪ হাজাৰ প্ৰদান কৰিব বুলি আয়োজক সমিতিয়ে জানিবলৈ দিছে। একেদৰে বিজয়ী ঘোঁৰাৰ জকীসকলৰ বাবেও সুকীয়াকৈ প্ৰাইজমানিৰ ব্যৱস্থা ৰখা হৈছে।
তাৰোপৰি উক্ত প্ৰতিযোগিতাত ৰাজ্যপাল জগদীশ মুখী মুখ্য অতিথি হিচাপে উপস্থিত থাকিব বুলি আয়োজক সমিতিয়ে জানিবলৈ দিছে।
