বাক্সা জিলাৰ তামুলপুৰ আৰক্ষী থানাৰ অন্তৰ্গত চিকনিবাৰীত আজি নাগালেণ্ডৰ এজন অস্ত্ৰ ব্যৱসায়ী সেনা-আৰক্ষীৰ হাতত ধৰা পৰে।
প্ৰাপ্ত তথ্য মতে, এক গোপন খবৰৰ ভিত্তিত ১২৭ (ডি) নং ৰঙিয়া-ভূটান আন্তঃৰাষ্ট্ৰীয় পথত তামুলপুৰ আৰক্ষীয়ে ভাৰতীয় সেনাৰ সহযোগত অভিযান চলাই পেইৰেই হাওঁ নামৰ অস্ত্ৰ ব্যৱসায়ীজনক গ্ৰেপ্তাৰ কৰিবলৈ সক্ষম হয়।
ধৃত পেইৰেই হাওঁ নাগালেণ্ডৰ পেনেৰ জিলাৰ হেমিঙলৱা আৰক্ষী থানাৰ অন্তৰ্গত নাগৱালৱা গাৱঁৰ কেজাই হাওঁৰ চল্লিশ বছৰীয়া পুত্ৰ।
তেওঁৰ পৰা আৰক্ষীয়ে এটা ৭.৬৫ পিষ্টল আৰু এটা মেগজিন জব্দ কৰে।
পেইৰাই হাওঁ এ সংবাদ মাধ্যমৰ আগত প্ৰকাশ কৰা মতে নাগালেণ্ডৰ ডিমাপুৰৰ পৰা এটা পিষ্টল ক্ৰয় কৰি আনিছিল আৰু সেইটো ভাৰত-ভূটান সীমান্তৰ কোনো অজ্ঞাত স্থানত বিক্ৰী কৰাৰ বাবে ডিমাপুৰৰ পৰা ৰঙিয়ালৈ আহি ৰঙিয়াৰ পৰা বাছেৰে তামুলপুৰ-ভূটান দিশত আহি আছিল।
আনহাতে, আজি পুৱা তামুলপুৰ আৰক্ষী চকীৰ ভাৰপ্রাপ্ত বিষয়া উপেন শৰ্মাই এক বিশেষ সূত্ৰৰ পৰা এই খবৰ লাভ কৰি গান্ধীবাৰী আৰক্ষী চকীৰ ভাৰপ্রাপ্ত বিষয়া ৰাজেন বড়োক অভিযান চলোৱাৰ নিৰ্দেশ দিয়ে। নিৰ্দেশ লাভ কৰাৰ পিছতে ৰাজেন বড়োয়ে ভাৰতীয় সেনাৰ সহযোগত ৰঙিয়া-ভূটান পথৰ চিকনিবাৰীত অভিযান চলাই পেইৰেইক আটক কৰিবলৈ সক্ষম হয়।
পেইৰেই এ সংবাদ মাধ্যমৰ আগত প্ৰকাশ কৰা মতে পিষ্টলটো তেওঁ কোনোবা ভাইটি নামৰ যুৱক এজনৰ ওচৰত বিক্ৰী কৰাৰ বাবে আহিছিল আৰু চিকনিবাৰীত তেওঁ বাছৰ পৰা নমাৰ পিছত তেওঁক কোনোবা অজ্ঞাত ঠাইলৈ লৈ যোৱাৰ কথা আছিল।
কিন্তু বাছৰ পৰা নমাৰ সময়তেই পেইৰেইক সেনা-আৰক্ষীৰ দলে কৰায়ত্ব কৰে।
পেইৰেই এ প্ৰকাশ কৰা মতে ইয়াৰ আগতেও তেওঁ ভাৰত-ভূটান সীমান্তত কেইবাটাও পিষ্টল বিক্ৰী কৰিছে।
অধিক তথ্যৰ বাবে পেইৰেইৰ বিৰুদ্ধে তামুলপুৰ আৰক্ষী থানাত এটা গোচৰ ৰুজু কৰি তামুলপুৰ আৰক্ষীয়ে জেৰা অব্যাহত ৰাখিছে বুলি জানিবলৈ দিয়ে।
