অসমকে ধৰি উত্তৰ-পূবৰ বিভিন্ন ঠাইত সিঁচৰতি হৈ থকা ৰাভা-হাচংসকলৰ প্ৰাচীন পৰম্পৰা তথা আচাৰ অনুষ্ঠান বাইখো পূজাৰ বিষয়ে বিশ্বক জনাৰ সুযোগ দিব পৰাকৈ ৰাভা-হাচং স্বায়ত্ত পৰিষদৰ অধীনত এখন আঁচনিৰ অংশ হিচাপে এখন তথ্যচিত্ৰ নিৰ্মাণ কৰি উলিওৱা হৈছে। ‘বাইখো’ নামৰ এই তথ্যচিত্ৰখনত ৰাভাসকলৰ প্ৰধান ধৰ্মীয় উৎসৱটোৰ বিষয়ে সকলো দিশৰ উপস্থাপনৰ প্ৰয়াস কৰা হৈছে।
‘আমি আমাৰ প্ৰধান উৎসৱ বাইখো পূজাৰ বিষয়ে, কিয় আৰু কেনেকৈ এই পূজা উৎসৱটো পালন কৰা হয়, তাৰ বিৱৰণেৰে এখন তথ্যচিত্ৰ নিৰ্মাণ কৰিছো।’ এন ই নাওৰ আগত এইদৰে কয় ৰাভা-হাচং স্বায়ত্ত পৰিষদৰ সাংস্কৃতিক বিভাগৰ কাৰ্য্যবাহী সদস্য জীৱন ৰাভাই।
জীৱন ৰাভাই জনোৱামতে বাইখো দেৱীক পূজা কৰাৰ পৰম্পৰাটো আৰম্ভ হৈছিল ফেদাৰদোৱা নামৰ গাওঁখনৰ পৰা। সেয়ে এই ঠাইখন হ’ল ৰাভাসকলৰ বাবে পৱিত্ৰ আৰু ঐতিহাসিক ঠাই।
উল্লেখযোগ্য যে মেঘালয়ৰ সীমান্তৰ পৰা মাত্ৰ ২ কিলোমিটাৰ আঁতৰত থকা গোৱালপাৰা জিলাৰ এই গাওঁখনত এখন সাংস্কৃতিক সন্মিলন আয়োজন কৰা হৈছিল, যিখনৰ ১০ মাৰ্চত সামৰণি পৰে। এই সন্মিলনত ৰাভাসকলৰ গৌৰৱময় ইতিহাসক সংৰক্ষণৰ লগতে ইয়াক প্ৰচাৰ কৰাত গুৰুত্ব দিয়া হয়।
‘নিজৰ জন্মস্থান, ইতিহাস আৰু সংস্কৃতিক পাহৰি যোৱা জাতি এটাই নিজৰ পৰিচয় হেৰুৱাই পৰজীৱীৰ দৰে হৈ পৰে।’ এইদৰে কয় সন্মিলনত ভাগ লোৱা বিপিন চুৰচাং নামৰ এজন বক্তাই।
আনহাতে বাইদা কলেজৰ প্ৰবক্তা শান্তাৰাম ৰাভাই ৰাভাসকল আন জাতিলৈ সলনি হোৱাৰ ঘোৰ বিৰোধিতা কৰে। ইয়াক তেওঁ ৰাভা-বিৰোধী আখ্যা দিয়ে।
মেঘালয়ৰ পৰা সন্মিলনখনত ভাগ লোৱা প্ৰতাপ ৰাভাই দাওৱা আৰু হুমজাৰৰ দৰে পৰম্পৰাগত নৃত্যৰ তাৎপৰ্য্য সম্পৰ্কেও ব্যাখ্যা।
সন্মিলনখনত বীৰুবালা ৰাভা, পবিত্ৰ ৰাভা আৰু শুক্ৰাচাৰ্য্য ৰাভাৰ কথা ৰাভা সম্প্ৰদায়ৰ উল্লেখযোগ্য ব্যক্তি হিচাপে উল্লেখ কৰা হয়।
