বিধানসভাৰ মজিয়াত উন্মোচিত হৈছে নগাঁৱৰ চৰকাৰী ভূমি বেদখলৰ ভয়ংকৰ তথ্য। দশক দশক ধৰি সন্দেহজনক লোকে নগাঁৱত দখল কৰি ৰাখিছে বৃহৎ পৰিসৰৰ চৰকাৰী ভূমি। পিজিআৰ, ভিজিআৰ সকলো শ্ৰেণীৰ ভূমিয়ে আছে বেদখলকাৰীৰ কবলত আছে বুলি জানিব পৰা গৈছে।
কলং আৰু সোণাই নৈৰ পাৰৰ বৃহৎ চৰকাৰী ভূমিত হৈছে বেদখল। বিধানসভাত প্ৰদান কৰা তথ্য অনুসৰি নগাঁও জিলাত বেদখলকাৰীৰ কবলত আছে সৰ্বমুঠ ১ লাখ ২৯ হাজাৰ ৩৭২ বিঘা ৩ কঠা ৪ লেছা চৰকাৰী ভূমি।
নগাঁও জিলাত ভিজিআৰ মাটি বেদখল হৈ আছে ২৬ হাজাৰ ৪১৩ বিঘা ৫ লেছা।তদুপৰি বেদখলকাৰীৰ দখলত আছে ১,৭৮৪ বিঘা ১ কঠা ১৪ লেছা পিজিআৰ ভূমি।
জিলাখনৰ কলং আৰু সোণাই নৈত সৰ্বাধিক মাটি বেদখল হৈ আছে। নগাঁও সদৰ ৰাজহ চক্ৰ এলেকাত ২৭ বিঘা ৩ কঠা ১৪ লেছা কলং নৈৰ মাটি বেদখল হৈছে আছে বুলি উন্মোচিত হৈছে তথ্য। আনহাতে, নগাঁও সদৰ ৰাজহ চক্ৰত সোণাই নৈৰ মাটি ৬ বিঘা ২ কঠা ৭ লেছা বেদখল হৈছে।
ইফালে, ৰূপহী ৰাজহ চক্ৰৰ অন্তৰ্গত সোণাই নৈৰ মাটিও বেদখল হৈছে। ৰূপহীত সোণাই নৈৰ মাটিৰ বেদখল হৈছে ৪০ বিঘা ১ কঠা। নগাবন্ধা, উদমাৰী, ৰৌমাৰী, হাতীপাৰা গাঁও এলেকাত বেদখল হৈছে সোণাই নৈৰ ভূমি।
ইফালে, চামগুৰিৰ ৰাজৰ চক্ৰৰ সোণাই নৈৰ মাটি ১৫ বিঘা হৈ আছে বেদখল। ৰূপহী টাউন, ৰূপহী ভকতগাঁও, বেলাগুৰি কছাৰীগাঁও আৰু লাওগাঁও এলেকাত বেদখল হৈ আছে এই ১৫ বিঘা ভূমি।
আজি অসম বিধানসভাত নগাঁৱৰ বিজেপি বিধায়ক ৰূপক শৰ্মাৰ লিখিত প্ৰশ্নৰ উত্তৰত ৰাজহ মন্ত্ৰী দিলে এই চাঞ্চল্যকৰ তথ্য। বিধানসভাত দাখিল কৰা উত্তৰতে ৰাজহ মন্ত্ৰীয়ে উল্লেখ কৰিছে যে অসম ভূমি নীতি ২০১৯ৰ দফা ৬ৰ অধীনত ভিজিআৰ আৰু পিজিআৰ ভূমিসমূহ সংৰক্ষণ আৰু বেদখলমুক্ত কৰি ৰখাৰ ব্যৱস্থা আছে।
ইফালে, ২০১৬ চনৰ পৰা সমগ্ৰ ৰাজ্যতে মুঠ ৬৭,৮৯১ বিঘা ১ কঠা ১৯ লেছা ভিজিআৰ-পিজিআৰ আৰু অন্যান্য চৰকাৰী তথা বনভূমি বেদখলমুক্ত কৰা হৈছে বুলিও জনায় ৰাজহ আৰু দুৰ্যোগ ব্যৱস্থাপনা বিভাগৰ মন্ত্ৰী কেশৱ মহন্তই।
