ভাৰতৰ মহাকাশ গৱেষণা সংস্থা ইছৰোৰ প্ৰায় ১০০ গৰাকী বিজ্ঞানীয়ে কম সময়ৰ ভিতৰতে স্বেচ্ছামূলক অৱসৰ গ্ৰহণ কৰিছে। এই পৰিস্থিতিৰ প্ৰতি লক্ষ্য ৰাখি কেন্দ্ৰীয় চৰকাৰে স্বেচ্ছামূলক অৱসৰৰ নিয়মৰ কিছু সালসলনি কৰিছে। যোৱা ১৪ জুলাই তাৰিখে কেন্দ্ৰীয় মহাকাশ বিভাগে এই নতুন নিৰ্দেশনা জাৰি কৰে। বিশেষকৈ ইউ আৰ ৰাও চেটেলাইট চেণ্টাৰ আৰু বিক্ৰম সাৰাভাই স্পেচ চেণ্টাৰলৈ এই নিৰ্দেশনা প্ৰেৰণ কৰা হৈছে, কাৰণ এই দুখন কেন্দ্ৰৰ পৰাই আটাইতকৈ বেছি বিজ্ঞানীয়ে চাকৰি এৰিছে।
কেন্দ্ৰীয় নিৰ্দেশনা অনুসৰি, গগনযান আৰু আন গুৰুত্বপূৰ্ণ মিছনৰ সৈতে জড়িত গ্ৰুপ-এ পৰ্যায়ৰ বিজ্ঞানী আৰু কাৰিকৰী কৰ্মীসকলৰ ইস্তফা এতিয়াৰে পৰা সহজে গ্ৰহণ কৰা নহ’ব। ইয়াৰ আগতে ইছৰোৰ বিভিন্ন কেন্দ্ৰৰ সঞ্চালকসকলেই বিজ্ঞানীসকলৰ ইস্তফা গ্ৰহণ কৰিব পাৰিছিল। কিন্তু নতুন নিৰ্দেশনাত তেওঁলোকৰ পৰা এই ক্ষমতা কাঢ়ি লোৱা হৈছে আৰু এতিয়াৰে পৰা কেৱল কেন্দ্ৰীয় মহাকাশ বিভাগেহে এই বিষয়ে সিদ্ধান্ত ল’ব। নিৰ্দেশনাটোত কোৱা হৈছে যে গুৰুত্বপূৰ্ণ মিছনৰ মাজভাগত এনেদৰে চাকৰি এৰি যোৱাৰ ফলত গগনযান আৰু আন প্ৰকল্পসমূহৰ যথেষ্ট ক্ষতি হৈছে, যিটো জাতীয় স্বাৰ্থৰ পৰিপন্থী।
শেহতীয়াকৈ ইছৰো এৰি যোৱা বিজ্ঞানীসকলৰ ভিতৰত প্ৰবীণ বিজ্ঞানী ভিক্টৰ জোচেফ টি অন্যতম। তেওঁ বিক্ৰম সাৰাভাই স্পেচ চেণ্টাৰত জিঅ‘চিনক্ৰ’নাছ চেটেলাইট লঞ্চ ভেহিকেল মাৰ্ক ৩ প্ৰকল্পৰ সঞ্চালক হিচাপে কাৰ্যনিৰ্বাহ কৰি আছিল। ইতিমধ্যে কেন্দ্ৰৰ এই নতুন নিৰ্দেশনা ইছৰোৰ অন্তৰ্গত আন আন কেন্দ্ৰ যেনে সতীশ ধাৱান স্পেচ চেণ্টাৰ, লিকুইড প্ৰপালচন চিষ্টেমছ চেণ্টাৰ, স্পেচ এপ্লিকেচন চেণ্টাৰ আৰু নেচনেল ৰিম’ট ছেন্সিং চেণ্টাৰলৈকো প্ৰেৰণ কৰা হৈছে।
এতিয়া প্ৰশ্ন হয়, হঠাৎ কিয় ইছৰোত এইদৰে চাকৰি এৰাৰ ঢৌ উঠিছে? বিশেষজ্ঞসকলৰ মতে, বৰ্তমান ভাৰতত মহাকাশ গৱেষণাৰ ক্ষেত্ৰখনত বহুতো নতুন বেচৰকাৰী কোম্পানী সোমাই পৰিছে। এই কোম্পানীবোৰে বিজ্ঞানীসকলক বহুত বেছি দৰমহা, উচ্চ পদবী আৰু কাম কৰাৰ অধিক স্বাধীনতা দিবলৈ প্ৰস্তুত আছে। সম্ভৱতঃ এই কাৰণেই বহুতো ডাঙৰ বিজ্ঞানীয়ে ইছৰোৰ পৰা আঁতৰি গৈছে।
