মানুহক বয়সে নহয়, ভাৱনাইহে বুঢ়া কৰে।
অফুৰন্ত প্ৰাণ শক্তিৰ অধিকাৰী লোক এজনক যে কেতিয়াও বয়সে হাৰ মনাব নোৱাৰে তাৰেই উদাহৰণ দাঙি ধৰিলে এগৰাকী ১০৩ বছৰীয়া ককাই।
নাম তেওঁৰ আলফ্ৰেড আল বাস্কি। আমেৰিকা নিবাসী এইগৰাকী ককাই তেওঁৰ দুই নাতিয়েকক কথা দিছিল যদি নাতিয়েকে স্নাতক পৰীক্ষাত উত্তীৰ্ণ হয় তেন্তে তেওঁ আকাশৰ পৰা জঁপিয়াই দিব।
সময়ত দুই নাতিয়েকে সুখ্যাতিৰে স্নাতক হ’ল। এইবাৰ ককাৰ প্ৰতিশ্ৰুতি ৰক্ষাৰ পাল।
ককাই বিশেষ কোনো কথা চিন্তা নকৰি নাতিয়েকক ক’লে আকাশৰ পৰা জঁপিওৱাৰ ব্যৱস্থা কৰিবলৈ।
দুই নাতিয়েকে বাধা কৰাৰ পিছতো কোনো বাধাই তলাব নোৱাৰিলে ককাক।
The 103-year-old said he would do it if his grandsons graduated college! ?
— GuinnessWorldRecords (@GWR) October 3, 2020
এটা সময়ত ককাৰ বাবে আকাশৰ পৰা জঁপিওৱাৰ সকলো ব্যৱস্থা কৰা হ’ল।
সেইমতে এখন বিমানত উঠি আকাশৰ ১৪ হাজাৰ ফুট উচ্চতালৈ উৰি গ’ল ককা।
লগত সংগী হিচাবে গ’ল তেওঁৰ এগৰাকী নাতি। ১৪ হাজাৰ ফুট উচ্চতাৰ পৰা ককাই নাতিয়েকৰ সৈতে দিলে তললৈ জঁপিয়ায়।
লগে লগে গীনিজ বুক অৱ ৰেকৰ্ডছত বিশ্বৰ আটাইতকৈ বয়োজ্যেষ্ঠ স্কাই ডাইভাৰ হিচাবে লিপিৱদ্ধ হ’ল ককাৰ নাম।
আকাশৰ বহু উচ্চতাৰ পৰা জঁপিওৱাৰ সময়তো ককাৰ মুখত ফুটি উঠা নাছিল কোনো ভয়ৰ চিন।
মনৰ অদম্য শক্তিৰ পৰিচয় দি ককা এতিয়া বহুতৰে বাবে হৈ পৰিছে আশা আৰু প্ৰেৰণাৰ প্ৰতীক।