নাগৰিকত্ব সংশোধনী বিধেয়কৰ প্ৰতিবাদত ৰাজ্যৰ অৰ্ধ শতাধিক জাতীয় সংগঠনে আজি আহ্বান জনোৱা ১২ ঘণ্টীয়া অসম বন্ধৰ হোজাই জিলাত মিশ্ৰিত প্ৰভাৱ পৰা দেখিবলৈ পোৱা যায়। বন্ধৰ সময়ছোৱাত জিলাখনৰ প্ৰায়বোৰ ঠাইতে দোকান পোহাৰৰ লগতে গাড়ীৰ চলাচল বন্ধ থাকে।
নীলবাগানৰ যুৱ সমাজৰ উদ্যেগত বন্ধৰ সমৰ্থক সকলে মটৰ চাইকেলেৰে ৰেলি কৰি বিজেপি চৰকাৰৰ বিৰুদ্ধে বিভিন্ন শ্লগান দি আকাশ বতাহ মুখৰিত কৰি তোলাৰ লগতে বন্ধৰ সমৰ্থনক সকলে নীলবাগানত ৫৪ নং ৰাষ্ট্ৰীয় ঘাই পথত টায়াৰ জ্বলাই তীব্ৰ প্ৰতিবাদ সাব্যস্ত কৰে।
বন্ধৰ সৰ্বাত্মক প্ৰভাৱ পৰা নীলবাগানত আৰক্ষীয়ে কৃষক মুক্তি সংগ্ৰাম সমিতি আৰু এজন অসম জাতীয়তাবাদী যুৱ ছাত্ৰ পৰিষদৰ সদস্যকে ধৰি ৬ জন বন্ধৰ সমৰ্থনকক আটক কৰি ডবকা আৰু নীলবাগান আৰক্ষী চকীত বন্দী কৰি ৰাখে।
আনহাতে ডবকা আৰু হোজাইত বন্ধৰ মিশ্ৰিত প্ৰভাৱ পৰিলক্ষিত হয়। ডবকাত বিজেপি কৰ্ম্মীয়ে বন্ধ ৰখা দোকান সমুহ খুলিবলৈ ওলাই অহাৰ লগতে আন একাংশ বঙালী সম্প্ৰদায়ৰ ব্যৱসায়ীয়ে দোকান পোহাৰ খোলা ৰাখে যদিও ৰাইজৰ উপস্থিতি শুন্য দেখা যায়। থিক সেইদৰে হোজাই চহৰতো বন্ধৰ সম্পূৰ্ন প্ৰভাৱ পৰা নাই যদিও একাংশ হিন্দু সম্প্ৰদায়ৰ ব্যৱসায়ী সকলৰ বাহিৰে অন্যান্য ব্যৱসায়ীক প্ৰতিষ্ঠান বন্ধ থকা পৰিলক্ষিত হয়।
আৰক্ষীয়েও জিলাখনৰ বিভিন্ন ঠাইত কটকটীয়া পহৰা দি থকা পৰিলক্ষিত হৈছে। বাতৰি লিখা সময়লৈকে কোনো স্থানৰ পৰা কোনো অপ্ৰীতিকৰ পৰিস্থিতিৰ উদ্ভৱ হোৱাৰ খবৰ অহা নাই।
মুঠৰ ওপৰত আজি কৃষক মুক্তি, অসম জাতীয়তাবাদী যুৱ ছাত্ৰ পৰিষদ, আমছুকে ধৰি প্ৰায় অৰ্ধশতাধিক দল-সংগঠনে যি উদ্ধেশ্য আগত ৰাখি ১২ ঘন্টীয়া বন্ধৰ আহ্বান জনাইছিল তাৰ প্ৰতি হোজাই জিলাৰ জনগনেও সমৰ্থন আগবঢ়োৱা দেখা গ’ল।
