ৰাজ্যত দুটাকৈ গুৰুত্বপূৰ্ণ পৰীক্ষাৰ সময়তে ছয় জনগোষ্ঠীৰ জনজাতিকৰণৰ বিৰোধিতাৰে আজি পুনৰ ১২ ঘণ্টীয়া অসম বন্ধৰ আহ্বান জনাইছে জনজাতি সংগঠনসমূহৰ সমন্বয়ৰক্ষী সমিতিয়ে। চৰকাৰে অসমৰ ছটা জনগোষ্ঠীক জনজাতিকৰণ কৰাৰ বাবে লোৱা সিদ্ধান্তত অসমৰ ১৪ টাকৈ খিলঞ্জীয়া জনজাতিৰ ক্ষতি হোৱাৰ আশংকা কৰি সংগঠনটোৱে ১৩ ফেব্ৰুৱাৰিৰ পুৱা ৫ বজাৰ পৰা সন্ধিয়া ৫ বজালৈ এই বন্ধৰ আহ্বান জনাইছে। অসমৰ অন্যান্য ৫৫ টাকৈ সংগঠনে আজিৰ বন্ধটোলৈ সমৰ্থন আগবঢ়াইছে।
ইফালে জনজাতীয় সাহিত্য সভাই বন্ধত সমৰ্থন জনোৱা বুলি ওলোৱা বাতৰিক অস্বীকাৰ কৰিছে সভাৰ সভাপতি গোবিন্দ টাইদ আৰু সম্পাদক কমলাকান্ত মুছাহাৰীয়ে। “ৰাজ্যৰ শিক্ষানুষ্ঠান সমূহত উচ্চতৰ মাধ্যমিক আৰু হাইস্কুল শিক্ষান্ত পৰীক্ষা চলি থকাৰ সময়ত কোনো সংগঠনে ঘোষণা কৰা অসম বন্ধক সভাই সমৰ্থন নজনাই”, বুলি স্পষ্ট কৰি দিছে সভাপতি আৰু সম্পাদকে দুজনে।
ইপিনে ৰাজ্যখনত দুটাকৈ গুৰুত্বপূৰ্ণ পৰীক্ষা চলি থকাৰ সময়ত দল-সংগঠন সমূহে অবিবেচনাৰে এইদৰে অসম বন্ধ আহ্বান কৰাত ৰাজ্যৰ সচেতন মহলতো প্ৰতিক্ৰিয়া দেখা গৈছে।
উল্লেখযোগ্য যে, জনজাতি সংগঠনসমূহৰ সমন্বয়ৰক্ষী সমিতিয়ে ভাৰত চৰকাৰক ২০১৫ চনৰ পৰাই নতুনকৈ ছটা জনগোষ্ঠীক জনজাতিকৰণৰ বিৰোধিতা কৰি। ভাৰত চৰকাৰে জনজাতিকৰণ বিধেয়কখন পৰ্য্যালোচনা কৰাৰ বাবে গঠন কৰি দিয়া মন্ত্ৰী দলৰ সৈতে সাত ফেব্ৰুৱাৰিত অনুষ্ঠিত হোৱা সমিতিৰ বৈঠকৰ সময়ত ৰাজ্যসভাত উত্থাপিত বিধেয়কখন বাতিল কৰাৰ প্ৰতিশ্ৰুতি দিছে বুলি দাবী কৰিছে সমন্বয়ৰক্ষী সমিতিখনে।