১৩ বছৰীয়া যন্ত্ৰণাৰ অন্ত পৰিল উচ্চতম ন্যায়ালয়ৰ এক ঐতিহাসিক ৰায়ৰ জৰিয়তে। এজন যুৱক যিয়ে বিগত ১৩ বছৰে কোমাৰ গভীৰ অন্ধকাৰত আছিল, তেওঁৰ লাইফ সাপোৰ্ট খুলি দি চিকিৎসা বন্ধ কৰাৰ অনুমতি প্ৰদান কৰিছে দেশৰ শীৰ্ষ আদালতে। এয়া কেৱল এখন আইনী যুদ্ধৰ সমাপ্তি নহয়, বৰঞ্চ এজন পুত্ৰৰ অসহ্যকৰ দুখ চাই থকা এহাল বৃদ্ধ পিতৃ-মাতৃৰ বাবে এক ডাঙৰ সকাহ। সন্মানসহকাৰে মৃত্যুৰ অধিকাৰ বা ইউথেনাচিয়া সম্পৰ্কে উচ্চতম ন্যায়ালয়ৰ এই সিদ্ধান্তই এক নতুন দিশ মুকলি কৰিছে।
১৩ বছৰ ধৰি কোমাত থকা এই যুৱকজনৰ নাম আছিল হৰিশ ৰানা। চণ্ডীগড় বিশ্ববিদ্যালয়ৰ চিভিল ইঞ্জিনিয়াৰিং বিভাগৰ ছাত্ৰ হৰিশে ২০১৩ চনত এক কৰুণ দুৰ্ঘটনাৰ সন্মুখীন হৈছিল। ৰাখীবন্ধনৰ দিনা এখন ঘৰৰ চতুৰ্থ মহলাৰ বাৰাণ্ডাৰ পৰা হঠাতে পৰি যোৱাৰ ফলত তেওঁৰ মূৰত গুৰুতৰ আঘাত লাগিছিল। সেই দুৰ্ঘটনাটোৰ পিছৰে পৰা তেওঁ স্থায়ীভাৱে অচেতন অৱস্থালৈ গুচি গৈছিল। চিকিৎসা বিজ্ঞানৰ ভাষাত ইয়াক পাৰমানেন্ট ভেজিটেটিভ ষ্টেট বুলি কোৱা হয়। ১৩ বছৰে বিচনাত লৰচৰ কৰিব নোৱাৰাকৈ পৰি থকা হৰিশৰ স্বাস্থ্যৰ কোনো উন্নতি পৰিলক্ষিত হোৱা নাছিল।
ন্যায়াধীশ জে বি পাৰ্দিৱালা আৰু ন্যায়াধীশ কে ভি বিশ্বনাথনৰ বিচাৰপীঠে এই সংবেদনশীল বিষয়টোত গুৰুত্বপূৰ্ণ ৰায়দান কৰে। আদালতে স্পষ্ট কৰি দিয়ে যে এনে ধৰণৰ স্থিতিত থকা এজন ৰোগীৰ ক্ষেত্ৰত মূল প্ৰশ্নটো হ’ল তেওঁৰ স্বাৰ্থ কিহত আছে। কেৱল কৃত্ৰিমভাৱে জীৱন দীঘলীয়া কৰিবলৈ চলাই থকা চিকিৎসা সঁচাকৈয়ে ৰোগীজনৰ বাবে প্ৰয়োজনীয় নেকি, সেয়া বিচাৰ কৰাটো জৰুৰী। হৰিশৰ পিতৃ-মাতৃয়ে নিজৰ চকুৰ আগত সন্তানৰ এই শোচনীয় অৱস্থা দেখি অতিষ্ঠ হৈ পৰিছিল আৰু সেইবাবেই তেওঁলোকে আদালতৰ ওচৰত ন্যায় বিচাৰিছিল।
চিকিৎসকৰ প্ৰতিবেদন অনুসৰি হৰিশ সম্পূৰ্ণৰূপে লাইফ সাপোৰ্টৰ ওপৰত নিৰ্ভৰশীল আছিল আৰু তেওঁ সুস্থ হৈ উঠাৰ কোনো সম্ভাৱনা নাছিল। উচ্চতম ন্যায়ালয়ৰ এই ঐতিহাসিক ৰায়ৰ পাছত হৰিশৰ লাইফ সাপোৰ্ট আঁতৰাই দিয়াৰ ক্ষেত্ৰত এতিয়া কোনো আইনী বাধা নাথাকিল। এই সিদ্ধান্তই প্ৰমাণ কৰিলে যে যন্ত্ৰণাদায়ক জীৱনতকৈ সন্মানসহকাৰে মৃত্যুৰ অধিকাৰো মানৱতাৰ এক অবিচ্ছেদ্য অংশ হ’ব পাৰে।
