মহাৰাষ্ট্ৰৰ ঔৰংগাবাদৰ জালনাৰ সমীপত সংঘটিত হৈছে এক মৰ্মান্তিক ৰে’ল দুৰ্ঘটনা।
পুৱতি নিশা প্ৰায় ৬-৩০বজাত এখন মালবাহী ৰে’লে মহটিয়াই নিলে ১৫জন প্ৰব্ৰজিত শ্ৰমিকক।
বাতৰি অনুসৰি, এই শ্ৰমিককেইজন মধ্য প্ৰদেশৰ নিজ ঘৰলৈ উভতি গৈ আছিল।
শ্ৰমিক কেইজনে ৰে’ল লাইনৰ ট্ৰেকত ধৰি খোজ কাঢ়ি গৈ আছিল।
ৰে’লৰ এগৰাকী বিষয়াই জানিবলৈ দিয়া মতে, নিশা শ্ৰমিক কেইজনে ট্ৰেকৰ ওপৰতে শুই পৰিছিল।
শুকুৰবাৰে পুৱতি নিশা তেওঁলোকৰ ওপৰেৰে মালবাহী ট্ৰেইনখন পাৰ হৈ যায়।
লকডাউনৰ মাজতে বিভিন্ন ৰাজ্যৰ প্ৰব্ৰজিত শ্ৰমিকসকলক ঘৰলৈ পঠিওৱাৰ বাবে বিশেষ শ্ৰমিক ৰে’ল চলোৱা আৰম্ভ কৰা হৈছে।
ইয়াৰ মাজতে বহুতেই খোজকাঢ়ি ঘৰলৈ ওভতাৰ চেষ্টা কৰিছে।
এনেদৰে খোজকাঢ়ি বা চাইকেলেৰে কেইবাশ কিলোমিটাৰ যাত্ৰা কৰা কেইবাজনো লোক মৃত্যু মুখত পৰা বাতৰিও পোৱা গৈছে।
কিন্তু এইবাৰ মহাৰাষ্ট্ৰত সংঘটিত হ’ল লকডাউনৰ সময়ৰ আটাইতকৈ মৰ্মান্তিক ঘটনাটো।