বিদ্যালয়ৰ ভিতৰতে ১৬ বছৰীয়া এগৰাকী ছাত্ৰক শিক্ষকে মাৰধৰ কৰাৰ অভিযোগক লৈ তীব্ৰ চাঞ্চল্যৰ সৃষ্টি হৈছে। অভিযোগ অনুসৰি, শিক্ষকে ছাত্ৰজনৰ চকুত জোৰেৰে ঘোচা মৰাৰ ফলত তেওঁৰ চকুত ৰক্ত জমা হয়। ঘটনাটো কৰ্ণাটকৰ মহীশূৰত সংঘটিত হোৱা বুলি সৰ্বভাৰতীয় সংবাদমাধ্যমৰ বাতৰি প্ৰকাশ পাইছে।
আহত ছাত্ৰজনৰ নাম ৰেহান শ্বৰীফ বুলি জানিব পৰা গৈছে। পৰিয়ালৰ অভিযোগ অনুসৰি, বিদ্যালয়ৰ ভিতৰত শিক্ষকে ছাত্ৰজনক প্ৰহাৰ কৰাৰ পিছত তেওঁৰ চকুত গুৰুতৰ আঘাত লাগে। বিদ্যালয়ৰ পৰা আহত অৱস্থাত ঘৰলৈ উভতি অহাৰ পিছতে ছাত্ৰজনে পৰিয়ালক ঘটনাৰ বিষয়ে জনায়।
ইয়াৰ পিছতে ছাত্ৰজনৰ পিতৃ ৱাছিম শ্বৰীফে থানাত শিক্ষকৰ বিৰুদ্ধে অভিযোগ দাখিল কৰে। একে সময়তে ছাত্ৰজনক চিকিৎসালয়লৈ লৈ যোৱা হয়। চিকিৎসকে পৰীক্ষা কৰাৰ পিছত জানিবলৈ দিয়ে যে তেওঁৰ এটা চকুত গুৰুতৰ আঘাত লাগিছে আৰু তাত ৰক্ত জমা হৈছে। বৰ্তমান ছাত্ৰজনৰ শাৰীৰিক অৱস্থা স্থিৰ বুলি জানিব পৰা গৈছে।
পৰিয়ালৰ আন এক অভিযোগ অনুসৰি, ছাত্ৰজনক মাৰধৰ কৰাৰ পিছতো শিক্ষকজনে তেওঁক ঘটনাটো বাহিৰত নক’বলৈ ভয় দেখুৱাইছিল। বাহিৰত ঘটনাটো ক’লে বিদ্যালয়ৰ পৰা ট্ৰান্সফাৰ চাৰ্টিফিকেট অৰ্থাৎ টিচি দি বিদ্যালয়ৰ পৰা উলিয়াই দিয়াৰ ভাবুকি দিয়াৰো অভিযোগ উঠিছে।
ঘটনাটোক লৈ ছাত্ৰজনৰ পৰিয়ালত তীব্ৰ ক্ষোভৰ সৃষ্টি হৈছে। পিতৃয়ে অভিযুক্ত শিক্ষকৰ বিৰুদ্ধে কঠোৰ ব্যৱস্থা গ্ৰহণ কৰিবলৈ আৰক্ষীৰ ওচৰত আবেদন জনাইছে। ইতিমধ্যে আৰক্ষীয়ে শিক্ষকৰ বিৰুদ্ধে গোচৰ ৰুজু কৰিছে যদিও তেওঁক এতিয়ালৈকে গ্ৰেপ্তাৰ কৰা হোৱা নাই।
ছাত্ৰজনক কিয় এইদৰে মাৰধৰ কৰা হৈছিল, ঘটনাৰ আঁৰত কি কাৰণ আছিল আৰু কিয় তেওঁক টিচি দিয়াৰ ভাবুকি দিয়া হৈছিল, সেই সকলো দিশ আৰক্ষীয়ে তদন্ত কৰি আছে। অভিযুক্ত শিক্ষককো সোধা-পোছাৰ বাবে তলব কৰা হৈছে।
