আজি শিৱসাগৰ চহৰত কেন্দ্ৰীয় তদন্তকাৰী সংস্থা, চি বি আয়ে কে পি চাৰি আলিত থকা নিউ ইণ্ডিয়া এছিউৰেন্স নামৰ বীমা কোম্পানিটোৰ শাখা প্ৰবন্ধকক ভেটী লৈ থকা অৱস্থাতে হাতে-লোটে ধৰে।
জানিব পৰা মতে শাখা প্ৰবন্ধক দেৱব্ৰত ৰক্ষিতে বহু দিনৰ পৰাই গ্ৰাহকৰ পৰা তেওঁলোকৰ গাড়ীৰ বীমাৰ ধন (ক্লেইমৰ ধন) মোকলাই দিবলৈ ঘোচ বিচাৰি আহিছিল।
কিন্তু এশ গৰু মাৰিলে বাঘৰো মৃত্যু হোৱাৰ দৰে আজি সেই কাম কৰিবলৈ গৈয়ে চি বি আইৰ জালত পৰিল শাখা প্ৰবন্ধকজন। জানিব পৰামতে এখন গাড়ীৰ বীমাৰ ধন মুকলি কৰি দিয়াৰ বিনিময়ত ৰক্ষিতে পৰীক্ষিত বৰুৱা নামৰ এজন ব্যক্তিৰ পৰা ধন বিচাৰিছিল।
পৰীক্ষিত বৰুৱাৰ উক্ত বাণিজ্যিক গাড়ীখন দুবছৰৰ আগতে দুৰ্ঘটনাগ্ৰস্ত হৈছিল। বাহনখনৰ বীমাৰ ধন এক লাখ টকা মুকলি কৰি দিয়াৰ বাবে তেওঁ ১০ হাজাৰ টকা দাবী কৰিছিল। তাৰ পিছতে গ্ৰাহক বৰুৱাই চি বি আইৰ গুৱাহাটীৰ কাৰ্য্যালয়ত অভিযোগ দিয়ে। তেওঁৰ অভিযোগৰ ভিত্তিত আজি চি বি আয়ে অভিযান চলাই প্ৰবন্ধক ৰক্ষিতক গ্ৰেপ্তাৰ কৰে।
সূত্ৰটোৱে জনোৱা মতে, আজি চি বি আইৰ পৰামৰ্শ ক্ৰমে পৰীক্ষিত বৰুৱাই উৎকোচৰ ১০ হাজাৰ টকা ধন দিবলৈ যায় আৰু ৰক্ষিতে পৰীক্ষিতৰ পৰা টকা গ্ৰহণ কৰোতেই চি বি আয়ে তেওঁক হাতে-লোটে ধৰে। লগতে কাৰ্যালয়ত প্ৰবন্ধকজনক জেৰা কৰি বহু সামগ্ৰীও জব্দ কৰিছে। জানিব পৰামতে দেৱব্ৰত ৰক্ষিতক গ্ৰেপ্তাৰ কৰি চি বি আইৰ দলটোৱে গুৱাহাটীলৈ নিছে।
