মোদী-নেতৃত্বাধীন বিজেপিক ফেচিবাদৰ প্ৰতিনিধি আখ্যা দি আজি মিজোৰাম বিজেপিৰ ১৭জনকৈ নেতাই দলত্যাগৰ কথা ঘোষণা কৰে। ইয়াৰ মাজত যোৱা বছৰ অনুষ্ঠিত বিধানসভা নিৰ্বাচনত প্ৰাৰ্থী হিচাপে থিয় দিয়া ৪জন নেতাও আছে।
দলত্যাগ কৰিবলৈ ওলোৱা নেতাকেইজনে কয় যে তেওঁলোকৰ উপৰি আন বহুতো নেতা-কৰ্মী দলটো এৰিবলৈ সাজু হৈছে। “আমাৰ সৈতে প্ৰায় ৫-৬ হাজাৰ সদস্যই দল ত্যাগ কৰিব। কিন্তু নিকট ভৱিষ্যতত প্ৰায় ১০ হাজাৰ সদস্যই দলটো ত্যাগ কৰিব”, নেতাকেইজনৰ মন্তব্য।
বিজেপিৰ প্ৰতি বিৰাগভাজন হোৱা নেতাকেইজনৰ ভিতৰত আছে আইজল জিলা বিজেপিৰ প্ৰাক্তন সভাপতি কে লালৰিমাৱিয়া আৰু আইজল জিলা মহিলা কোষৰ সভানেত্ৰীও আছে।
দলটো ফেচিবাদৰ মজিয়া আখ্যা দি নেতাকেইজনে কয় দলত কথা কোৱাৰ কোনো সুযোগেই নাই। কেৱল কেন্দ্ৰীয় নেতৃত্বৰ নিৰ্দেশ বহন কৰিবলৈ হেঁচা দিয়া হয়।
‘‘মই যেতিয়া মিজোৰাম বিজেপিৰ সভাপতি আছিলো, মোক দিল্লীত নিজৰ ঠাইৰ কাম-কাজৰ বিষয়ে ক’বলৈ মাত্ৰ ২ মিনিট সময় দিছিল’’, দলটোৰ কেন্দ্ৰীয় নেতৃত্বৰ প্ৰতি বিষোদগাৰ কৰি কে লালৰিমাৱিয়াই কয়।
“বিজেপিয়ে প্ৰতিখন ৰাজ্যতে সংকটৰ সন্মুখীন হৈছে। এইটো এই কাৰণে হৈছে যে দলটোত গণতন্ত্ৰৰ পৰিৱৰ্তে ফেচিবাদ আছে।” তেওঁ কয়।
আনহাতে আগন্তুক সাধাৰণ নিৰ্বাচনত এক মাত্ৰ সমষ্টিটোত দলটোৱে এজন চাকমা লোকক টিকট দিয়া বাবেও অসন্তুষ্টি প্ৰকাশ কৰে দলত্যাগী নেতাকেইজনে। “আমি এজন খিলঞ্জীয়া প্ৰতিনিধি বিচাৰো যিজনে সংখ্যাগৰিষ্ঠসকলৰ হৈ মাত মাতিব পাৰে”, পদত্যাগৰ ইয়ো এটা কাৰণ আখ্যা দি কে লালৰিমাৱিয়াই কয়।
“দলে এইবাৰ প্ৰাৰ্থিত্ব দিয়া নিহাৰ কান্তি চাকমা সংখ্যালঘু চাকমা সকলৰ মাজৰ আৰু তেওঁ এজন খিলঞ্জীয়া নহয়। আমি এজন মিজো প্ৰতিনিধি বিচাৰো”, তেওঁ কয়।
মিজোৰাম ৰাজ্যিক বিজেপিৰ নিৰ্বাচনী কমিটীয়ে ৰামতিয়ামাৰ নামটো প্ৰস্তাৱ কৰা সত্ত্বেও কেন্দ্ৰৰ নেতৃত্বই সেয়া বিবেচনা নকৰিলে বুলি ক্ষোভ প্ৰকাশ কৰে নেতাকেইজনে।
তেওঁলোকে দলটোৱে নাগৰিকত্ব সংশোধনী বিধেয়ক অঞ্চলটোৰ মানুহৰ ওপৰত জাপি দিব খোজাৰ কথাটোও টানি আনে আৰু ইয়াক সংবিধান বিৰোধী তথা ধৰ্মীয় বৈষম্যৰ প্ৰয়োগ আখ্যা দিয়ে নেতাকেইজনে।
‘‘আমি মোদী নেতৃত্বাধীন দলটো ত্যাগ কৰিবলৈ সকলো বিজেপি সদস্যকে আহ্বান জনাইছো।’’ কেন্দ্ৰীয় চৰকাৰখন অৰ্থনীতি, প্ৰতিৰক্ষা, নিৰাপত্তা সকলো দিশতে ব্যৰ্থ বুলি অভিযোগ কৰা নেতাকেইজনে কয়।
