দেওবাৰে বেলুচ বিদ্ৰোহীৰ আক্ৰমণত কমেও নিহত হৈছে ১৮ জন পাকিস্তানী জোৱান । সংঘৰ্ষত দুজন সাধাৰণ নাগৰিককে ধৰি মুঠ ৫জন লোক গুৰুতৰভাৱে আহত হয়।
ইয়াৰ পিছতেই প্ৰত্যুত্তৰ দিয়ে পাকিস্তানী সৈন্যই। পাক সেনাৰ আক্ৰমণত কমেও ২৩ জন উগ্ৰপন্থী নিহত হয়।
উল্লেখ্য যে পাকিস্তানৰ দক্ষিণ-পশ্চিম প্ৰদেশ বেলুচিস্তানৰ পৰিস্থিতি শুকুৰবাৰে নিশাৰ পৰাই উত্তপ্ত হৈ আছে।
পাকিস্তানী সামৰিক সূত্ৰৰ তথ্য অনুসৰি শুকুৰবাৰে গভীৰ নিশা বেলুচিস্তানৰ কালাট জিলাৰ মংগোচৰ চহৰত বিদ্ৰোহীয়ে এটা পথ অৱৰোধ কৰাৰ চেষ্টা চলায়। সেই সময়ত সেই ৰাস্তাৰে সেনাবাহিনীৰ বাছ এখন পাৰ হৈ গৈছিল। বিদ্ৰোহীৰ লক্ষ্য আছিল বাছখন।
ইয়াৰ বিপৰীতে সেনাৰ সংবাদ মাধ্যমৰ শাখা আন্তঃসেৱা জনসংযোগই দাবী কৰিছিল যে ২৩জন উগ্ৰপন্থী সেনাৰ হাতত নিহত হৈছে।
ইফালে, বেলুচিস্তানৰ বিদ্ৰোহী সংগঠন বেলুচ লিবাৰেশ্যন আৰ্মীয়ে সেনাবাহিনীৰ ওপৰত কৰা আক্ৰমণৰ দায়িত্ব স্বীকাৰ কৰিছে। মন কৰিবলগীয়া যে শুকুৰবাৰে নিশা কালাট জিলাৰ তিনিটা অঞ্চলত পাকিস্তানী সেনাই বেলুচ বিদ্ৰোহীক আক্ৰমণ কৰে।
এই সন্দৰ্ভত বেলুচ লিবাৰেশ্যন আৰ্মীৰ মুখপাত্ৰ আজাদ বালোচে জিলাখনৰ বিভিন্ন প্ৰান্তত পাকিস্তানী সেনাৰ চকীত আক্ৰমণ চলোৱা বুলি জানিবলৈ দিয়ে। এই অভিযানতত কমেও ১০০ বিদ্ৰোহী জড়িত আছিল বুলি প্ৰকাশ কৰা হৈছে। পাকিস্তানৰ ৰাষ্ট্ৰপতি আছৰাৱা আলী জাৰ্দাৰী আৰু পাকিস্তানৰ প্ৰধানমন্ত্ৰী শ্বেহবাজ শ্বৰীফে দাবী কৰিছে যে পাকিস্তানী সেনাই ‘জেহাদী’ক নিৰ্মূল কৰাত সফল হৈছে। অৱশ্যে তেওঁলোকে এই বিদ্ৰোহীৰ এই আক্ৰমণক তীব্ৰ গৰিহণা দিয়ে।
