কৃষক মুক্তি সংগ্ৰাম সমিতি আৰু চৰ-চাপৰি সাহিত্য পৰিষদৰ বৰপেটা জিলা সমিতিৰ উদ্যোগত আজি জিলাখনৰ গাগলমাৰীত নহৰু খেতিয়কৰ সমস্যা সন্দৰ্ভত এখন ৰাইজমেল অনুষ্ঠিত হয়। এই ৰাইজমেলত জিলাখনৰ বিভিন্ন অঞ্চলৰ খেতিয়কে অংশগ্ৰহণ কৰে।
উল্লেখযোগ্য যে, উৎপাদিত ফচলৰ সঠিক মূল্য নাপাই হাহাকাৰ পৰিস্থিতিৰ সন্মুখীন হৈছে বৰপেটা জিলাৰ নহৰু খেতিয়কসকল। চৰ-চাপৰি সাহিত্য পৰিষদৰ বৰপেটা জিলা সমিতিৰ সম্পাদক মজিবৰ ৰহমানৰ পৌৰহিত্যত অনুষ্ঠিত ৰাইজমেলত গুৱাহাটী বিশ্ববিদ্যালয়ৰ অধ্যাপক ড০ দিলীপ বৰাই অংশগ্ৰহণ কৰি সম্প্ৰতি কেন্দ্ৰ আৰু ৰাজ্য চৰকাৰে কৃষকসকলক সকাহ দিয়াৰ উদ্দেশ্যে কোনো ফলপ্ৰসূ কাৰ্যব্যৱস্থা গ্ৰহণ নকৰাত কৃষকসকলৰ অৱস্থা ক্ৰমাৎ শোচনীয় হৈ পৰা বুলি মন্তব্য কৰে।
ৰাজ্যৰ কৃষকসকলে নিজৰ প্ৰচেষ্টাত কৃষি কাৰ্যত ব্ৰতী হৈ থকাৰ পিচতো উৎপাদিত ফচলৰ উচিত মূল্য লাভ নকৰা বিষয়টোত আশ্চৰ্য প্ৰকাশ কৰে। ৰাজ্য চৰকাৰে কৃষকসকলৰ সমস্যা সমাধানৰ বাবে বিহিত ব্যৱস্থা গ্ৰহণ নকৰিলে মহাৰাষ্ট্ৰত কৃষকসকলে লোৱা বৃহৎ প্ৰতিবাদী কাৰ্যসূচী ল’বলৈ বাধ্য হ’ব বুলিও চৰকাৰক সকীয়াই দিয়ে বৰাই।
ৰাইজমেলত চৰ-চাপৰি সাহিত্য পৰিষদৰ সভাপতি ড০ হাফিজ আহমেদ, ছাত্ৰ মুক্তি সংগ্ৰাম সমিতিৰ কেন্দ্ৰীয় কাৰ্যকৰী সভাপতি আশ্ৰাফুল ইছলাম আৰু চৰ-চাপৰি সাহিত্য পৰিষদৰ বৰপেটা জিলা সমিতিৰ উপ-সভাপতি হালিমা আহমেদে অংশগ্ৰহণ কৰে।
উল্লেখযোগ্য যে, বৰপেটা জিলাৰ গাগলমাৰী, লুৰফুৰীয়া, কান্দাপাৰা আদি বৃহত্তৰ অঞ্চলৰ কৃষক ৰাইজে কেইবাশ বিঘা মাটিত নহৰু খেতি কৰিছে। কিন্তু খেতিয়কসকলে উৎপাদন কৰা নহৰুৰ উচিত মূল্য নোপোৱাৰ বাবে হাহাকাৰ অৱস্থাৰ সৃষ্টি হৈছে। প্ৰতি কিলো নহৰু এতিয়া খেতিয়কসকলে ৫-১০ টকা দৰত বিক্ৰী কৰিব লগা হৈছে। খেতিয়কসকলে জানিবলৈ দিয়া মতে, প্ৰতিবিঘা নহৰু খেতি কৰোতে ২৫-৩০ হাজাৰ টকা খৰচ হয়। প্ৰতি কিলো নহৰু উৎপাদন খৰচ অতি কমেও ২০ টকা হয়। কিন্তু এতিয়া খেতিয়কসকলে এই নহৰু পানীৰ দৰত বিক্ৰী কৰিব লগা হৈছে। ফলত খেতিয়কসকলৰ মাজত হাহাকাৰ অৱস্থাৰ সৃষ্টি হৈছে।
খেতিয়কসকলৰ এই দুৰৱস্থা ৰোধ কৰাৰ বাবে আজি অনুষ্ঠিত ৰাইজমেলৰ জৰিয়তে চৰকাৰে খেতিয়কৰ পৰা ন্যূনতম সমৰ্থন মূল্যৰ বিনিময়ত নহৰু ক্ৰয় কৰাৰ ব্যৱস্থা কৰা, বৃহত্তৰ অঞ্চলটোৰ খেতিয়কসকলক সকাহ দিব পৰাকৈ এটা শীতল ভঁৰাল স্থাপন কৰাকে আদি কৰি কেইবাটাও গুৰুত্বপূৰ্ণ দাবী সন্দৰ্ভত প্ৰস্তাৱ গ্ৰহণ কৰা হয়।
