নাগৰিকত্ব বিধেয়কৰ বিৰুদ্ধে যুঁজ অব্যাহত থকাৰ সময়তে সম্পূৰ্ণ হোৱাৰ দিশে আগবাঢ়িছে অসমৰ দল-সংগঠনে সৰ্বাত্মক বিৰোধিতা কৰা ২০০০ মেগাৱট ক্ষমতাসম্পন্ন নামনি সোৱণশিৰি জলবিদ্যুৎ প্ৰকল্প।
এসময়ত নদীবান্ধ বিৰোধিতাৰে অসমবাসীৰ হৃদয় জিনা বিজেপি নেতৃত্বাধীন কেন্দ্ৰীয় চৰকাৰৰ শক্তি মন্ত্ৰীয়েই বৃ্হস্পতিবাৰে দিছে এই ইংগিত।
“কাম পুনৰ আৰম্ভ হোৱাৰ চাৰি বছৰ পিছতে বান্ধটো মুকলি কৰা হ’ব,” এই মন্তব্য কেন্দ্ৰীয় ৰাজ্যিক শক্তি মন্ত্ৰী (স্বতন্ত্ৰ) ৰাজ কুমাৰ সিঙৰ। তাৎপৰ্য্যপূৰ্ণভাৱে মন্ত্ৰীগৰাকীয়ে প্ৰকল্পটোৰ কাম পুনৰ আৰম্ভ হোৱা বুলি স্পষ্টকৈ নোকোৱা সত্ত্বেও সূত্ৰ অনুসৰি পূৰ্ণগতিত ২৪ ঘণ্টাই কাম চলি আছে গেৰুকামুখত।
সেই অনুসৰি আৰু হয়তো এক-দুই বছৰৰ ভিতৰতে অসমবাসীৰ আশংকাক একাশৰীয়া কৰি মুকলি হ’ব অতি বৃহৎ বান্ধটো।
সোৱণশিৰি বান্ধটোৰ নিৰ্মাণ “প্ৰতিবাদ”ৰ ফলত ২০১১ চনৰ পৰা বন্ধ আছে বুলি কোৱা মন্ত্ৰীগৰাকীৰ তথ্য মতেই মুঠ ৫৯৫০ মেগাৱট ক্ষমতাসম্পন্ন মুঠ ১৬টা বান্ধৰ কাম স্তব্ধ হৈ আছে “ধনৰ নাটনি আৰু অন্যান্য কাৰণত”।
১৬টা প্ৰকল্পৰ দহটাই বন্ধ থকাৰ কাৰণ “বিত্তীয় নাটনি”। শক্তি সম্পৰ্কীয় সংসদীয় সমিতিৰ আগত এই সমূহ তথ্য প্ৰকাশ কৰিছে মন্ত্ৰী সিঙে।
