কাৰ্বি আংলং স্বায়ত্তশাসিত পৰিষদৰ বাবে সংবিধানৰ ষষ্ঠ অনুসূচীৰ অধীনত নতুন আইন আৰু নিয়ম-কানুনৰ প্ৰচলন আৰু ভোটাৰ তালিকাৰ পৰা অজনজাতিৰ লোকৰ নাম কৰ্তনৰ দাবীৰে আজি ২৪ প্লাছ নামৰ কেইবাটাও সামাজিক সংগঠনৰ ঐক্যবদ্ধ গোটে ধৰ্ণা কাৰ্য্যসূচী পালন কৰা হয়।
ছেমছন সিং ইংতি সোঁৱৰণী উদ্যানৰ সন্মুখত এই প্ৰতিবাদী কাৰ্য্যসূচীত অংশগ্ৰহণকাৰীসকলক উদ্দেশ্যি দিয়া ভাষণত জে আই কাথাৰে কয়, “আমি কাৰ্বি স্বায়ত্তশাসিত পৰিষদত নতুন আইন আৰু নীতি প্ৰৱৰ্তন আৰু জিলাখনৰ ভোটাৰ তালিকাৰ পৰা অজনজাতীয় লোকৰ নাম কৰ্তনৰ বাবে আন্দোলন কৰিব লাগিব। ১৯৬৯-অত সেই সময়ৰ নেতাসকলে ষষ্ঠ অনুসূচীৰ ক্ষমতা ৰাজ্যপালৰ ওচৰত এৰি দিছিল। তাৰ আগলৈকে কাৰ্বি আংলঙৰ সকলো ক্ষমতা পাহাৰী জনজাতিসকলৰ হাততে আছিল।”
আনহাতে ষষ্ঠ অনুসূচীৰ প্ৰসংগ আনি তেওঁ কয় যে ষষ্ঠ সংবিধানৰ অনুসূচীৰ দফা ২ আৰু উপদফা ৭ মতে জিলাখনৰ জনজাতীয় লোকসকলেই হ’ল পৰিষদৰ নীতি আৰু আইন প্ৰণয়নৰ একমাত্ৰ কৰ্তৃপক্ষ। ৰাজ্যপালে কেৱল ইয়াত অনুমোদনহে দিব পাৰে। কিন্তু এতিয়া পৰিষদৰ হাতত কোনো ক্ষমতা নাই আৰু ৰাজ্যপালৰ হুকুমৰ অধীন।
ইফালে তেওঁ গুৱাহাটী উচ্চ ন্যায়ালয়ে কাৰ্বি পৰিষদক নতুন আইন প্ৰণয়ন কৰিবলৈ নিৰ্দেশ দিয়া সত্ত্বেও সেয়া কৰা নাই বুলি কাৰ্বি পৰিষদক দোষাৰোপ কৰে।
“এইটো আমাৰ অৱগত যে কাৰ্বি পৰিষদৰ নিৰ্বাচিত প্ৰতিনিধিসকলে এইটো কৰা নাই। তেওঁলোকে দুজন অজজাতীয় লোকক, ক্ৰমে জয়ন্ত চুতীয়া আৰু বি কে মিশ্ৰক, কাৰ্বি পৰিষদৰ নীতি-নিয়ম প্ৰস্তুতি কমিটীত অন্তৰ্ভুক্ত কৰিছে।” এইদৰে কয় কাথাৰে।
কাৰ্বি পৰিষদৰ নীতি-নিয়ম প্ৰস্তুতি কমিটীৰ এজন সদস্যক এই কামৰ কি হৈছে বুলি কাথাৰে সোধাত তেওঁ সেই ফাইলটো গুৱাহাটীলৈ প্ৰেৰণ কৰা বুলি জনায়। এই কথাত কাথাৰে প্ৰশ্ন কৰে, “কাৰ্বি আংলঙৰ স্বায়ত্তশাসিত পৰিষদৰ বাবে গুৱাহাটীয়ে কেনেকৈ নিয়ম বনাব?”
আনহাতে কাথাৰে বংগসেনাকো আক্ৰমণ কৰি কয় যে অনুপ্ৰৱেশে কাৰ্বি আংলঙৰ জনগাঁথনি সলনি কৰি দিছে। “বিজেপ আৰু বংগসেনাই আজিৰ প্ৰতিবাদী সভাত মানুহে যাতে অংশগ্ৰহণ কৰিব নোৱাৰে তাৰ বাবে হোজাই আৰু লামডিঙত ৰেইল ৰখাই দিছে। নহ’লে আজি আৰু মানুহে ইয়াত অংশগ্ৰহণ কৰিলে হেঁতেন। ইয়াত বংগসেনাই কাম কৰি আছে আৰু আমাৰ মানুহে তেতিয়াহে জানিব যেতিয়া আমি নিজৰ ঠাইৰ পৰাই বিতাৰিত হ’ম। ত্ৰিপুৰাত খিলঞ্জীয়া মানুহে ইতিপূৰ্বে সেইটো পৰিস্থিতিৰ সন্মুখীন হৈছে। ইয়াতো বেছি দিন নাই।” কাথাৰে কয়।
২৪ প্লাছ নামৰ সন্মিলিত গোটটোৰ দাবীসমূহৰ ভিতৰত অসম ভূমি আৰু ৰাজহ আইন, ১৮৮৬ৰ বাতিল আৰু প্ৰথাগত ভূমি নীতিৰ পুনৰ প্ৰৱৰ্তন, ষষ্ঠ অনুসূচীৰ ৪ নং দফাৰ জনজাতীয় প্ৰথাগত আইন পুনৰ প্ৰৱৰ্তন, দফা ৩ আৰু উপদফা ১ৰ অধীনত জনজাতীয় গাওঁ পৰিষদ গঠন কৰা ইত্যাদি।
প্ৰতিবাদী কাৰ্য্যসূচীৰ অংশস্বৰূপে চহৰখনত এটা শোভাযাত্ৰা উলিওৱা হয়। এই কাৰ্য্যসূচীৰ বাবে ৫ ঘণ্টা ধৰি ডিফু চহৰৰ দোকান-পোহাৰ বন্ধ থাকে। প্ৰতিবাদী কাৰ্য্যসূচীটোক নেতৃত্ব প্ৰদান কৰে কাৰ্বি আংলং ৰং আছাৰ আমেইৰ সভাপতি ধনচিং ৰংহাং, ২৪ প্লাছ আহ্বায়ক ৰতন তেৰাং, ছেমছন তেৰন, হেম্ফু ইংতি, ৰাজেশ টিছু, ক্লিৰদপ তেৰাং, আংতং ইংতি কাথাৰ আৰু জনা তেৰাঙে।
