যোৱা ৩ অক্টোবৰত হিমাচল প্ৰদেশৰ ৰুটাঙত নিৰ্মাণ কৰা বিশ্বৰ দীৰ্ঘতম টানেলটো প্ৰধানমন্ত্ৰী নৰেন্দ্ৰ মোদীয়ে উদ্বোধন কৰিছিল।
শেহতীয়াকৈ উদ্বোধনৰ মাত্ৰ ২৪ ঘণ্টা ভিতৰতে উক্ত টানেলত তিনিটাকৈ দুৰ্ঘটনা সংঘটিত হোৱাৰ খবৰ আহিছে। ইয়াৰ পিছতে ৰাজ্য চৰকাৰ তথা প্ৰশাসনৰ উদ্বেগ বৃদ্ধি পোৱাৰ পৰলিক্ষিত হৈছে।
খবৰৰ মতে উক্ত টানেলত বাইক আৰোহীসকলে অঘোষিত প্ৰতিযোগিতাত অৱতীৰ্ণ হোৱাৰ ফলতেই অতি কম সময়ৰ ভিতৰতে এনেদৰে দুৰ্ঘটনাবোৰ সংঘটিত হৈছে।
ইফালে উদ্বোধন কৰাৰ পিছত ৰাজ্য চৰকাৰে উক্ত টানেলত বাইক আৰোহীসকলৰ গতি বিধি লক্ষ্য কৰিবলৈ আৰক্ষীৰ লোকক মোতায়েন কৰা নাছিল বুলিও অভিযোগ উত্থাপন হৈছিল। ইয়াৰ ফলতে বাইক আৰোহীসকলে অঘোষিত প্ৰতিযোগিতাত অৱতীৰ্ণ হ’বলৈ সুযোগ লাভ কৰি আহিছিল বুলি অভিযোগ উত্থাপন হৈছে।
মাত্ৰ ২৪ ঘণ্টাৰ ভিৰততে তিনিটাকৈ দুৰ্ঘটনা সংঘটিত হোৱাৰ পিছত প্ৰশাসনে প্ৰায় ৪৮ ঘণ্টাৰ অন্তত টানেলটোত আৰক্ষীৰ লোকক মোতায়েন কৰিছে বুলি জানিব পৰা গৈছে।
টানেলৰ চিচি টিভি ফুটেজত বাইক আৰোহীসকলৰ অঘোষিত বাইক ৰাইডিং প্ৰতিযোগিতাৰ দৃশ্য বন্দী হৈ ৰৈছে। আনকি ৰাস্তাৰ মাজত গাড়ী ৰখাই লৈ টানেলত চেল্ফী উঠাৰো ধুম দেখা গৈছে চিচি টিভি ফুটেজত। ইয়াৰ ফলতে দুৰ্ঘটনাবোৰ সংঘটিত হৈছে বুলি ধাৰণা কৰা হৈছে।
এই সন্দৰ্ভত বিআৰঅ’ৰ মুখ্য অভিযন্তা কে পি পুৰুষোত্তমে সংবাদ মাধ্যমৰ আগত কয়, “টানেলৰ মাজত গাড়ী ৰখোৱা কোনো নিয়ম নাই। আনকি পিছৰ বাহনখনে আগৰ বাহনখনক অতিক্ৰম কৰাৰো নিয়ম নাই। কাৰণ এইটো হৈছে ডাব্বল লেণ্ড।”
উল্লেখ্য যে যোৱা শনিবাৰে হিমাচল প্ৰদেশৰ মানালিৰ পৰা লাহুল-স্পিতি উপত্যকাৰ পৰ্যন্ত ৯.০২ কিলোমিটাৰ দৈৰ্ঘ্যৰ টানেলটো প্ৰধানমন্ত্ৰী নৰেন্দ্ৰ মোদীয়ে উদ্বোধন কৰিছিল।
১০ হাজাৰ ফুট উচ্চতাত অৱস্থিত বিশ্বৰ দীৰ্ঘতম টানেলটোত দৈনিক ৩ হাজাৰ চাৰি চকীয়া বাহন আৰু ডেৰ হাজাৰ ট্ৰাক প্ৰতি ঘণ্টাত ৮০ কিলোমিটাৰ গতিত চলিব পাৰিব।
