ত্ৰিপুৰাত শুকুৰবাৰে নতুনকৈ ৩০ গৰাকী ব্যক্তিৰ শৰীৰত মাৰাত্মক ক’ৰ’না ভাইৰাছৰ উপস্থিতি ধৰা পৰে।
শুকুৰবাৰে নতুনকৈ ক’ৰ’নাত আক্ৰান্ত হোৱা ৩০ গৰাকী ব্যক্তিকে ধৰি বৰ্তমানলৈ ত্ৰিপুৰাত ক’ৰ’নাত আক্ৰান্ত হোৱা লোকৰ সংখ্যা ১১৮ গৰাকীলৈ বৃদ্ধি পালে।
শুকুৰবাৰে ত্ৰিপুৰাত নতুনকৈ ক’ৰ’নাত আক্ৰান্ত হোৱা ব্যক্তি সকলৰ ভিতৰত ২৫ গৰাকী বি এছ এফৰ জোৱান।
শুকুৰবাৰে ক’ৰ’নাত আক্ৰান্ত হোৱা বুলি নিশ্চিত হোৱা বি এছ এফৰ ২৫ গৰাকী জোৱানৰ ভিতৰত এজনক বাদ দি বাকী আটাইবোৰ ঢালাই জিলাৰ আমবাচাৰ ৮৬ বেটেলিয়নৰ সদস্য।
‘‘সাৱধান! ত্ৰিপুৰাত আজি পুনৰ ৩০ গৰাকী ব্যক্তি নতুনকৈ ক’ৰ’নাত আক্ৰান্ত হৈছে। ২৫ গৰাকী ৮৬ বেটেলিয়নৰ, ৪ গৰাকী বি এছ এফৰ ১৩৮ বেটেলিয়নৰ পৰিয়ালৰ সদস্য আৰু এগৰাকী ট্ৰাক চালক। ত্ৰিপুৰাত ক’ৰ’নাৰ আক্ৰান্তৰ মুঠ সংখ্যা ১১৮ গৰাকী আৰু দুগৰাকীক চিকিৎসালয়ৰ পৰা আৰোগ্যৰ অন্তত মুক্তি দিয়া হৈছে,’’ ত্ৰিপুৰাৰ মুখ্য মন্ত্ৰী বিপ্লৱ কুমাৰ দেৱে শুকুৰবাৰে নিশা এইদৰে টুইট কৰে।
ইয়াৰ পূৰ্বে ত্ৰিপুৰাত বি এছ এফৰ ৮৬ বেটেলিয়নৰ ওচৰত থকা ১৩৮ বেটেলিয়নৰ মুখ্য কাৰ্য্যালয়ৰ ৮৬ গৰাকী জোৱান ক’ৰ’নাত আক্ৰান্ত হৈছিল।
উল্লেখযোগ্য যে, ভাৰতত বি এছ এফ, চি আৰ পি এফ আৰু আৰক্ষীৰ বাহিনীৰ বহু সংখ্যক জোৱান ক’ৰ’নাত আক্ৰান্ত হোৱাৰ পাছত দেশৰ আভ্যন্তৰীণ আৰু বাহ্যিক সুৰক্ষাগত দিশৰ পৰা বিষয়টো চিন্তনীয় হৈ পৰিছে।
