বন মন্ত্ৰী প্ৰমীলাৰাণী ব্ৰহ্মই বন বিভাগৰ কামকাজত পৰিৱৰ্তন অনাৰ বাবে বাৰে বাৰে প্ৰতিশ্ৰুতি দি আহিছে যদিও বিভাগটোৰ ভিতৰচৰাৰ কামকাজক লৈ এতিয়াও মানুহৰ সন্দেহ আঁতৰা নাই। বিশেষকৈ কাঠৰ চোৰাং ব্যৱসায়ী আৰু বন বিষয়াৰ মাজৰ বুজাবুজিৰ অভিযোগ সততে উত্থাপিত হৈ অহা দেখা গৈছে। উজনি অসমত কাঠৰ আন্তঃৰাজ্যিক চোৰাং কাৰবাৰীয়ে চৰাইপুং বনাঞ্চলকে ধৰি প্ৰায়বোৰ বনাঞ্চলতে আগৰ দৰেই নিজৰ দপদপনি অব্যাহত ৰাখিবলৈ সক্ষম হৈয়ে আছে। কালি পুৱাৰ ভাগত ডুমডুমা বন সংমণ্ডলৰ অধীনৰ কাকপথাৰত স্থানীয় কেইজন মান যুৱকে বন বিভাগৰ সহযোগত চাৰিখনকৈ চোৰাং কাঠভৰ্তি ট্ৰাক জব্দ কৰাৰ দৰে ঘটনাই এই কথা প্ৰমাণ কৰিছে যে এতিয়াও অঞ্চলটোত চোৰাং কাঠৰ ব্যৱসায়ীৰ বন ধ্বংস কাৰ্য্য অব্যাহত আছে। আনহাতে তাৎপৰ্য্যপূৰ্ণ কথা যে স্থানীয় যুৱককেইজনে কাঠভৰ্তি চাৰিখন ট্ৰাক জব্দ কৰাৰ কথা কৈছে যদিও বন বিভাগে ইয়াৰে দুখন কুঁৱলী আৰু আন্ধাৰৰ সুযোগ লৈ পলাই গ’ল বুলিহে ভাষ্য দিছে। গতিকে কথাটোত ৰাইজে সন্দেহৰ গোন্ধ পাইছে। জব্দ কৰা ট্ৰাককেইখনৰ নম্বৰ হ’ল ক্ৰমে AS-06 AC -0252 আৰু AS-01 CC-4675 আৰু দুয়োখনকে ডুমডুমা বন সংমণ্ডললৈ অনা হৈছে।
আনহাতে ঘটনাটোৰ সময়ত গুৱাহাটীত থকা ডুমডুমা বন সংমণ্ডল বিষয়াক যোগাযোগ কৰাত জব্দ কৰা ট্ৰাকৰ সংখ্যা চাৰিখন বুলি কয়। ঘটনাটোৱে মানুহৰ মাজত বন বিভাগৰ প্ৰতি সন্দেহৰ উদ্ৰেক কৰিছে।
আনহাতে ঘটনাটোৰ সন্দৰ্ভত এভাৰগ্ৰীন ফাউণ্ডেইশ্যন নামৰ বেচৰকাৰী সংস্থাটোৰ সচিব দেৱজিত মৰাণ আৰু এভাৰগ্ৰীন বাডছ ছ’চাইটিৰ সভাপতি বিজয় গগৈয়ে অভিযোগ কৰে যে কাঠ মাফিয়াই দীৰ্ঘদিনৰ পৰা ডুমডুমা বন সংমণ্ডলৰ বিভিন্ন অংশত বন ধ্বংস কৰি আহিছে আৰু চোৰাংকৈ সেইবোৰ বিক্ৰী কৰাৰ ফলত চৰকাৰৰ প্ৰচুৰ ৰাজহ হানি হয়।
https://youtu.be/LVDq4ng3Kk4
