অসম আন্দোলনৰ জাতীয় শ্বহীদ পোৱাল দাসৰ ৩৯ তম মৃত্যু দিৱসত আজি ১৪ ফ্ৰেব্ৰুৱাৰীত পোৱাল দাসৰ সমাধিক্ষেত্ৰত শিমলুগুৰি মৌজা আঞ্চলিক ছাত্ৰ সন্থাৰ উদ্যোগত বনাই বাসীৰ সহযোগত ৰাজহুৱা শ্ৰদ্ধাঞ্জলী অনুষ্ঠান পালন কৰা হয়৷
ৰাজহুৱা শ্ৰদ্ধাঞ্জলী অনুষ্ঠান শুভাৰম্ভ কৰে শ্বহীদ দাসৰ জেষ্ঠ ভগ্নী মাকন দাসে। অসম আন্দোলনত গুলীবিদ্ধ কৃতী শিক্ষক ৰমেন শৰ্মা, সদৌ অসম ছাত্ৰ সন্থা সদস্য জিতু নেওগ তথা পোৱাল দাসৰ পৰিয়ালৰ সদস্যসকলৰ লগতে ৫১ নং বহতীয়া প্ৰাথমিক বিদ্যালয়ৰ সহ শিক্ষক অভিজিৎ পাছনি, ঔগুৰি উচ্চ মাধ্যমিক বিদ্যালয়ৰ শিক্ষক অমৃত ভূঞা, গড়পাৰ প্ৰথমিক বিদ্যালয়ৰ শিক্ষক বিদ্যাধৰ হাজৰিকাই সমূহীয়াকৈ শ্ৰদ্ধাঞ্জলি জনায়৷
স্মৃতিচাৰণ সভাত উপস্থিত থাকে সদৌ যোৰহাট জিলা ছাত্ৰ সন্থাৰ মুখ্য সাংগঠনিক সম্পাদক ৰণ্টু ভূঞা, মহকুমা ছাত্ৰ সন্থাৰ উপদেষ্টা যদুমণি বৰুৱা, শিমলুগুৰি মৌজা আঞ্চলিক ছাত্ৰ সন্থাৰ প্ৰাক্তন সম্পাদক হৰিনাৰায়ণ হাজৰিকা, টীয়ক আঞ্চলিক ছাত্ৰ সন্থাৰ সভাপতি পাপু কলিতা, সাধাৰণ সম্পাদক পাঞ্জল দত্ত, শিমলুগুৰি মৌজা আঞ্চলিক ছাত্ৰ সন্থাৰ সভাপতি দেবব্ৰত শইকীয়া সাধাৰণ সম্পাদক পবিত্ৰ বৰাকে ধৰি শতাধিক ৰাইজ উপস্থিত থাকে৷
স্মৃতিচাৰণ সভাত বক্তব্য ৰাখি ৰমেন শৰ্মাই জাতীয় শ্বহীদ পোৱাল দাসৰ মৃত্যুৰ দিনাই একে লগে থকাৰ স্মৃতি ৰোমন্থন কৰাৰ লগতে সেই সময়ৰ ঘটনাৰ সম্পৰ্কত ব্যাখ্যা কৰে৷
শিক্ষক তথা অসম আন্দোলনৰ কৰ্মী বিদ্যাধৰ হাজৰিকা আৰু ঔগুৰি উচ্চ মাধ্যমিক বিদ্যালয়ৰ সহকাৰী শিক্ষক তথা আন্দোলনৰ সময়ত নিৰ্যাতিত অমৃত ভূঞাই বক্তব্য ৰাখি পোৱাল দাসৰ নামত বনাই ঘাটৰ পৰা অৰুণামুখলৈ থকা পথটো নামাকৰণ কৰিবলৈ আহ্বান জনায়৷
সভাত সদৌ অসম ছাত্ৰ সন্থাৰ সদস্য জিতু নেওগে বক্তব্য ৰাখি কয় যে অসম আন্দোলনৰ গুলীবিদ্ধ নিৰ্যাতিত সকলৰ পৰিয়াল সমূহৰ বাবে প্ৰয়োজনীয় ব্যৱস্থা কৰাৰ লগতে যোগ্যতা ভিত্তিত নিযুক্তিৰ ব্যৱস্থা কৰিবৰ কাৰণে চৰকাৰক দাবী জনায়৷
স্মৃতিচাৰণ সভাতেই জাতীয় শ্বহীদ পোৱাল দাসৰ নামত পথটো নামাকৰণ কৰাৰ ক্ষেত্ৰত শিমলুগুৰি মৌজা আঞ্চলিক ছাত্ৰ সন্থাই প্ৰয়োজনীয় ব্যৱস্থা গ্ৰহণ কৰিব বুলি শিমলুগুৰি মৌজা আঞ্চলিক ছাত্ৰ সন্থাৰ সভাপতি দেবব্ৰত শইকীয়া আৰু সাধাৰণ সম্পাদক পবিত্ৰ বৰাই জনায়৷
