অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে ৰাজ্যৰ এটা বিশেষ সংখ্যালঘু সম্প্ৰদায়ক লক্ষ্য কৰি ধাৰাবাহিকভাৱে ঘৃণাৰ ভাষণ দিয়াৰ অভিযোগত উচ্চতম ন্যায়ালয়ত সংবিধানৰ ৩২ নং অনুচ্ছেদৰ অধীনত আন এক লেখ আবেদন দাখিল কৰা হৈছে। এই আবেদনখন দেশৰ উচ্চতম ন্যায়ালয়ৰ মুখ্য ন্যায়াধীশ সূৰ্য কান্তৰ বিচাৰপীঠত জৰুৰী শুনানিৰ বাবে উল্লেখ কৰা হৈছে।
আবেদনকাৰীসকলৰ ভিতৰত আছে বিশিষ্ট বুদ্ধিজীৱী ড° হীৰেন গোহাঁই, অসমৰ প্ৰাক্তন আৰক্ষী সঞ্চালক প্ৰধান হৰেকৃষ্ণ ডেকা, নৰ্থ ইষ্ট নাওৰ মুখ্য সম্পাদক পৰেশ মালাকাৰ আৰু জ্যেষ্ঠ অধিবক্তা শান্তনু বৰঠাকুৰ।
বিশিষ্ট ব্যক্তি ৪জনে অভিযোগ কৰিছে যে মুখ্যমন্ত্ৰীয়ে অসমত বাসকৰা বংগমূলীয় মুছলমানসকলৰ বিৰুদ্ধে বৈষম্যমূলক আচৰণ কৰিবলৈ আৰু তেওঁলোকক সামাজিক তথা অৰ্থনৈতিকভাৱে বৰ্জন কৰিবলৈ উদগনি দিছে।
আবেদনখনত উল্লেখ কৰা অনুসৰি যোৱা জানুৱাৰী মাহৰ ২৫ আৰু ২৭ তাৰিখে ভোটাৰ তালিকাৰ সংশোধন প্ৰক্ৰিয়াৰ বিষয়ে মন্তব্য কৰাৰ সময়ত মুখ্যমন্ত্ৰীয়ে ‘মিঞা ভোট’ কৰ্তন কৰিব লাগে বুলি ক্ৰমান্বয়ে বিতৰ্কিত মন্তব্য কৰিছিল।
তদুপৰি মুখ্যমন্ত্ৰীয়ে তেওঁৰ দলীয় কৰ্মীসকলক সংখ্যালঘু সম্প্ৰদায়ৰ লোকৰ বিৰুদ্ধে অভিযোগ দাখিল কৰিবলৈ নিৰ্দেশ দিয়াৰ কথা স্বীকাৰ কৰা বুলিও আবেদনত দাবী কৰা হৈছে।
আবেদনকাৰীসকলে কয় যে এনেধৰণৰ মন্তব্যই সংবিধানৰ ১৪, ১৫, ১৯ আৰু ২১ নং অনুচ্ছেদৰ দ্বাৰা নিশ্চিত কৰা সমতা, মৰ্যাদা আৰু জীয়াই থকাৰ অধিকাৰক উলংঘা কৰিছে।
আবেদনকাৰীৰ হৈ অধিবক্তা ৰূপালী ছামুৱেলে এই গোচৰটো ইয়াৰ পূৰ্বে চিপিআই(এম) আৰু চিপিআই-য়ে দাখিল কৰা আবেদনৰ সৈতে একেলগে শুনানি গ্ৰহণৰ বাবে অনুৰোধ জনায় আৰু মুখ্য ন্যায়াধীশে ইয়াক তালিকাভুক্ত কৰিবলৈ সন্মতি প্ৰদান কৰে।
উচ্চতম ন্যায়ালয়ত দাখিল কৰা এই আবেদনখনত ৭ ফেব্ৰুৱাৰী ২০২৬ তাৰিখে অসম বিজেপিৰ অফিচিয়েল এক্স (পূৰ্বৰ টুইটাৰ) একাউণ্টত প্ৰকাশ পোৱা এটা ভিডিঅ’ৰ কথাও উল্লেখ কৰা হৈছে। আবেদনকাৰীসকলৰ মতে সেই ভিডিঅ’টোত মুখ্যমন্ত্ৰীয়ে বন্দুক চলাই থকা দেখা গৈছিল আৰু তাত ব্যৱহাৰ কৰা শব্দসমূহে এটা নিৰ্দিষ্ট সম্প্ৰদায়ক লক্ষ্য কৰি লোৱা বুলি অভিযোগ উত্থাপন হৈছে।
আবেদনখনত কোৱা হৈছে যে ৰাজ্যৰ মুৰব্বী এজনৰ মুখৰ পৰা অহা এনে ভাষণে সমাজত বিভাজনৰ সৃষ্টি কৰিছে আৰু চৰকাৰী তন্ত্ৰই তেওঁৰ বিৰুদ্ধে কোনো ব্যৱস্থা গ্ৰহণ নকৰাৰ ফলত এক ভয়মুক্ত পৰিবেশৰ পৰিৱৰ্তে অপৰাধীৰ সাহসহে বৃদ্ধি পাইছে।
আবেদনকাৰীসকলে মুখ্যমন্ত্ৰীৰ বিৰুদ্ধে এক বিশেষ তদন্তকাৰী দল চমুকৈ এছ আই টি (SIT) গঠন কৰিবলৈ বা উচ্চতম ন্যায়ালয়ৰ প্ৰাক্তন ন্যায়াধীশৰ অধ্যক্ষতাত এখন তদন্ত আয়োগ গঠন কৰিবলৈ দাবী জনাইছে। তেওঁলোকে লগতে কয় যে উচ্চতম ন্যায়ালয়ে ইয়াৰ পূৰ্বে বিভিন্ন গোচৰত ঘৃণাৰ ভাষণৰ বিৰুদ্ধে স্বত:স্ফূৰ্তভাৱে গোচৰ ৰুজু কৰিবলৈ নিৰ্দেশ দিছিল যদিও অসমৰ ক্ষেত্ৰত তেনে হোৱা নাই। বৰ্তমান এই গোটেই বিষয়টো উচ্চতম ন্যায়ালয়ৰ বিচৰাধীন হৈ আছে আৰু মুখ্য ন্যায়াধীশে ইয়াক অতি সোনকালে শুনানিৰ বাবে দিন ধাৰ্য কৰিব বুলি জানিব পৰা গৈছে।
