নেপালৰ তানাহুন জিলাৰ মাৰ্চিয়াংদি নদীত শুকুৰবাৰে ভাৰতীয় যাত্ৰীবাহী বাছ ডুব গৈ ১৪ জন লোকৰ মৃত্যু হোৱাৰ লগতে ১৬ জন আহত হয়। পোখাৰাৰ পৰা কাঠমাণ্ডুলৈ গৈ আছিল ৪০ জন ভাৰতীয়ক লৈ যোৱা বাছখন।
তানাহুন জিলাৰ ডি এছ পি দীপকুমাৰ ৰায়ে জনোৱা মতে, ইউ পি (উত্তৰ প্ৰদেশ) এফ টি ৭৬২৩ নম্বৰ প্লেট থকা বাছখন নদীত ডুব যায়। তানাহুন জিলাৰ আইনা পাহাৰাত সংঘটিত হয় এই দুৰ্ঘটনা।
সশস্ত্ৰ আৰক্ষী বাহিনী নেপাল দুৰ্যোগ ব্যৱস্থাপনা প্ৰশিক্ষণ বিদ্যালয়ৰ জ্যেষ্ঠ আৰক্ষী অধীক্ষক মাধৱ পৌডেলৰ নেতৃত্বত ৪৫ জনীয়া আৰক্ষী জোৱানৰ এটা দলে দুৰ্ঘটনাস্থলীত উপস্থিত হৈ উদ্ধাৰ অভিযান চলাই আছে।
পোখাৰাৰ মাঝেৰী ৰিজৰ্টত থকা ভাৰতীয় যাত্ৰীসকল। শুকুৰবাৰে পুৱা পোখাৰাৰ পৰা কাঠমাণ্ডু অভিমুখে ৰাওনা হ’ল বাছখন।
উত্তৰ প্ৰদেশৰ সাহায্য আয়ুক্তই কয় যে বাছখনত ৰাজ্যৰ কোনো ব্যক্তি আছে নেকি সেই বিষয়ে জানিবলৈ যোগাযোগ স্থাপনৰ চেষ্টা চলাইছে বুলি এএনআইয়ে প্ৰকাশ কৰিছে।
উল্লেখ্য যে, বিগত মাহত নেপালৰ প্ৰায় ৬৫ জন যাত্ৰী কঢ়িয়াই অনা দুখন বাছ ভূমিস্খলনৰ ফলত ত্ৰিশুলি নদীত বাগৰি পৰে। এই দুৰ্ঘটনাত ৭ জন ভাৰতীয়কে ধৰি ৫০ জনৰো অধিক লোকৰ মৃত্যু হোৱা বুলি অনুমান কৰা হৈছে।
প্ৰচণ্ড বৰষুণৰ মাজতে সংঘটিত এই দুৰ্ঘটনাটো মধ্য নেপালৰ মদন-অশ্ৰিত ঘাইপথত সংঘটিত হয়। ইয়াৰে এখন বাছ কাঠমাণ্ডুৰ পৰা ৰাউতহাটৰ গৌৰলৈ গৈ আছিল। আনখন বীৰগঞ্জৰ পৰা কাঠমাণ্ডুলৈ ৰাওনা হৈছিল।
