ডিব্ৰুগড় জিলাৰ চেচা ন-গাঁৱত আজি বনৰীয়া হাতীৰ গচকত এজন ৪০ বৰ্ষীয় ব্যক্তিৰ মৃত্যু হয়।
মৃত ব্যক্তিজনক লেজাই অঞ্চলৰ মেগনাথ গোৱালা বুলি চিনাক্ত কৰা হৈছে।
এই সন্দৰ্ভত সংবাদ মাধ্যমৰ আগত এজন বন বিষয়াই কয়, “চেচা ন-গাঁৱত এজন লোকক হাতীয়ে গচকি হত্যা কৰিছে বুলি খবৰ পাইছিলো। খবৰ পোৱাৰ পিছতে আমি ঘটনাস্থলীত উপস্থিত হওঁ।”
বনৰীয়া হাতীটো কাষৰে দিহিং-মেডলা সংৰক্ষিত বনাঞ্চলৰ পৰা অঞ্চলটোলৈ ওলাই আহিছিল বুলি বন বিষয়াজনে জানিবলৈ দিয়ে।
তেওঁ লগতে কয়, “মানুহজনে ৰাতিপুৱা গৰু চৰাবলৈ ওলাই গৈছিল আৰু হঠাতে তেওঁ এটা বনৰীয়া হাতীৰ মুখামুখি হৈছিল। হাতীটোৱে তেওঁক খেদি খেদি গচকি হত্যা কৰে।”
ইতিমধ্যে আৰক্ষীয়ে মৃত মেগনাথ গোৱালাৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰিছে।
আনহাতে লক্ষী নাথ নামৰ এজন স্থানীয় বাসিন্দাই কয় যে দিহিং-মেডলা বন সংৰক্ষিত অঞ্চলৰ পৰা ওলাই অহা হাতীৰ জাকে প্ৰতি বছৰে গাঁওখনৰ লোকসকলৰ শস্য নষ্ট কৰাৰ লগতে গাঁওখনত যথেষ্ট অনিষ্ট সাধন কৰে।
বনৰীয়া হাতীৰ বাবে গাঁওবাসীয়ে যথেষ্ট নিৰাপত্তাৰ সংশয়ত ভুগিছে বুলিও তেওঁ লগতে কয়।
উল্লেখ্য যে শেহতীয়াকৈ ৰাজ্যৰ পৰিৱেশ আৰু বন মন্ত্ৰী পৰিমল শুক্লবৈদ্যই যোৱা ১০ বছৰত ৰাজ্যখনত হাতী-মানুহৰ সংঘাটত প্ৰায় ৯২৪ জন লোক নিহত হৈছে বুলি তথ্য প্ৰকাশ কৰিছিল।
