অসম প্ৰদেশ কংগ্ৰেছৰ উদ্যোগত আয়োজিত ‘সময় পৰিৱৰ্তনৰ যাত্ৰা’ৰ প্ৰথম পৰ্যায়ৰ দেওবাৰে মঙলদৈত সামৰণি পৰে। এই যাত্ৰাৰ নেতৃত্ব দিয়া যোৰহাটৰ সাংসদ গৌৰৱ গগৈয়ে মঙলদৈত উপস্থিত হৈ মুখ্যমন্ত্ৰী ড° হিমন্ত বিশ্ব শৰ্মাই তেওঁৰ বিৰুদ্ধে উত্থাপন কৰা ‘পাকিস্তান লিংক’ৰ অভিযোগক তীব্ৰ ভাষাৰে সমালোচনা কৰে। সাংসদ গগৈৰ মতে, মুখ্যমন্ত্ৰীয়ে দেওবাৰে দিল্লীৰ সাংবাদিক মাতি আনি সম্বোধন কৰা সংবাদমেলখন এক ‘সম্পূৰ্ণ বিফল’ অনুষ্ঠানত পৰিণত হৈছে।
সাংসদ গৌৰৱ গগৈয়ে সংবাদ মাধ্যমৰ আগত কয় যে মুখ্যমন্ত্ৰীয়ে যিবোৰ অভিযোগ উত্থাপন কৰিছে, সেই একেখিনি কথা তেওঁ ১০ ছেপ্টেম্বৰৰ আগৰ পৰাই কৈ আছিল। গগৈয়ে প্ৰশ্ন কৰে যে যদি অভিযোগসমূহ ইমানেই গুৰুত্বপূৰ্ণ আছিল, তেন্তে মুখ্যমন্ত্ৰীয়ে যোৱা ৬ মাহ ধৰি কিয় মৌনতা অৱলম্বন কৰি আছিল? পাকিস্তান ভ্ৰমণৰ প্ৰসংগত সাংসদগৰাকীয়ে স্পষ্ট কৰি দিয়ে যে এজন সাংসদ হিচাপে তেওঁৰ বিদেশ ভ্ৰমণৰ সকলো তথ্য কেন্দ্ৰীয় চৰকাৰৰ হাতত থাকে। নিৰ্বাচন কাষ চাপি অহাৰ বাবেহে মুখ্যমন্ত্ৰীয়ে এনে ভিত্তিহীন অভিযোগ উত্থাপন কৰিছে বুলি তেওঁ দাবী কৰে।
মুখ্যমন্ত্ৰীৰ পৰিয়ালৰ বিৰুদ্ধে ভূমি দখলৰ ওলোটা অভিযোগ উত্থাপন কৰি গৌৰৱ গগৈয়ে কয় যে ‘সময় পৰিৱৰ্তনৰ যাত্ৰা’ৰ মাত্ৰ চাৰিটা দিনতে তেওঁলোকে মুখ্যমন্ত্ৰীৰ দখলত থকা ৪০০০ বিঘা ভূমি চিনাক্ত কৰিবলৈ সক্ষম হৈছে। তেওঁ অভিযোগ কৰে যে সমগ্ৰ অসমত মুখ্যমন্ত্ৰীৰ পৰিয়ালৰ দখলত প্ৰায় ১২০০০ বিঘা ভূমি আছে। চৰকাৰী ভূমি আইন সলনি কৰি ৯০ শতাংশ মাটি অবৈধভাৱে দখল কৰা হৈছে বুলিও তেওঁ গুৰুতৰ অভিযোগ উত্থাপন কৰে। গগৈয়ে ঘোষণা কৰে যে ভৱিষ্যতে কংগ্ৰেছ চৰকাৰ শাসনলৈ আহিলে এই মাটিসমূহ উদ্ধাৰ কৰি ভূমিহীন দুখীয়া ৰাইজৰ মাজত বিতৰণ কৰা হ’ব।
মুখ্যমন্ত্ৰীৰ সংবাদমেলক ‘ছুপাৰ-ডুপাৰ ফ্লপ’ আখ্যা দি গগৈয়ে কংগ্ৰেছৰ এই যাত্ৰাক ‘ছুপাৰ বাম্পাৰ হিট’ বুলি অভিহিত কৰে। দৰং জিলাৰ মঙলদৈত সামৰণি পৰা এই কাৰ্যসূচীত এ আই চি চিৰ নেতা জীতেন্দ্ৰ সিং, পৃথ্বীৰাজ সাথে, মনোজ চৌহানৰ লগতে সাংসদ ৰকিবুল হুছেইন আৰু প্ৰাক্তন সাংসদ ৰিপুন বৰাকে ধৰি কেইবাজনো জ্যেষ্ঠ নেতা উপস্থিত থাকে। সাংসদগৰাকীয়ে জানিবলৈ দিয়ে যে শীঘ্ৰেই এই যাত্ৰাৰ দ্বিতীয় পৰ্যায়ৰ কাৰ্যসূচী ঘোষণা কৰা হ’ব।
