ভাৰতীয় মুছলমানৰ গণহত্যাৰ মুকলি আহ্বানৰ লগতে জাতিৰ পিতা মহাত্মা গান্ধী সন্দৰ্ভত বিৰূপ মন্তব্যৰে সমগ্ৰ দেশ জোকাৰি যোৱা হৰিদ্বাৰ সাম্প্ৰদায়িক ভাষণ প্ৰসঙ্গত ৰাষ্ট্ৰপতি আৰু প্ৰধানমন্ত্ৰীলৈ পত্ৰ লিখিলে পাঁচজন সশস্ত্ৰ বাহিনীৰ প্ৰাক্তন মুৰব্বীৰ লগতে প্ৰাক্তন আমোলা আৰু বিশিষ্ট নাগৰিকসহ এশৰো অধিক লোকে।
পত্ৰখনত খ্ৰীষ্টান, দলিত আৰু শিখ সম্প্ৰদায়ৰ দৰে অন্যান্য সংখ্যালঘুসকলক লক্ষ্য কৰি লোৱাৰ কথাও উল্লেখ কৰা হৈছে।
এনে ধৰণৰ হিংসাৰ আহ্বানে আভ্যন্তৰীণভাৱে বিভেদ সৃষ্টি কৰাৰ লগতে আৰু বাহ্যিক শক্তিকো উৎসাহিত কৰিব পাৰে বুলি পত্ৰখনত উল্লেখ কৰিছে।
পত্ৰখনত কোৱা হৈছে, “ৰাষ্ট্ৰৰ ভিতৰত যিকোনো শান্তি আৰু সম্প্ৰীতি ভংগ কৰিলে বিদ্বেষপূৰ্ণ বাহ্যিক শক্তিক উৎসাহিত কৰিব। আমাৰ বিবিধতাৰে ভৰপূৰ সমাজত এটা সম্প্ৰদায়ৰ বিৰুদ্ধে হিংসাৰ বাবে এনে ধৰণৰ স্পষ্ট আহ্বানে গুৰুতৰভাৱে প্ৰভাৱিত কৰিব।”
“হৰিদ্বাৰত অনুষ্ঠিত হিন্দু সাধু আৰু অন্যান্য নেতাসকলৰ ধৰ্ম সংসদ নামৰ ৩ দিনীয়া ধৰ্মীয় সন্মিলনৰ সময়ত দিয়া ভাষণৰ বিষয়বস্তুৰ দ্বাৰা আমি গুৰুতৰভাৱে বিচলিত হৈছো। হিন্দু ৰাষ্ট্ৰ স্থাপন আৰু প্ৰয়োজন হ’লে হিন্দু ধৰ্মৰ সুৰক্ষাৰ নামত অস্ত্ৰ-শস্ত্ৰ উঠাই ভাৰতৰ মুছলমানসকলক হত্যা কৰাৰ বাবে বাৰে বাৰে আহ্বান জনোৱা হৈছিল।
আমি এনে ধৰণৰ উচতনিমূলক ৰাজহুৱা ঘৃণাৰ অভিব্যক্তি আৰু হিংসাৰ অনুমতি দিব নোৱাৰো। এইয়া কেৱল আভ্যন্তৰীণ নিৰাপত্তাৰ গুৰুতৰ উলংঘন নহয়, ই আমাৰ ৰাষ্ট্ৰৰ সামাজিক গাঁথনিও ছিঙি পেলাব পাৰে। এজন বক্তাই সেনা আৰু আৰক্ষীক অস্ত্ৰ-শস্ত্ৰ তুলি ল’বলৈ আৰু পৰিষ্কাৰ পৰিচ্ছন্নতা অভিযানত অংশগ্ৰহণ কৰিবলৈ আহ্বান জনাইছিল। এইয়া সেনাক আমাৰ নিজৰ নাগৰিকৰ গণহত্যাত অংশগ্ৰহণ কৰিবলৈ কোৱাৰ সমান। ই নিন্দনীয় আৰু গ্ৰহণযোগ্য নহয়।” এইদৰে পত্ৰখনত উল্লেখ কৰা হৈছে।
উল্লেখ্য যে ইয়াৰ পূৰ্বে উচ্চতম ন্যায়ালয়ৰ ৭৬ জন অধিবক্তাই ভাৰতৰ মুখ্য ন্যায়াধীশ এন ভি ৰমনালৈ পত্ৰ লিখি উচ্চতম ন্যায়ালয়ক এই হিংসাত্মক আহ্বানৰ ক্ষেত্ৰত হস্তক্ষেপ কৰি স্বতঃস্ফূৰ্ত ভাৱে বিবেচনা কৰিবলৈ আহ্বান জনাইছিল।