উৰিষ্যাত সংঘটিত হৈছে ইটোৰ পিছত সিটো গণধৰ্ষণ। এইবাৰ ময়ুৰভঞ্জ জিলাত সংঘটিত হৈছে আন এক লোমহৰ্ষক গণধৰ্ষণ। আৰক্ষীৰ সূত্ৰৰ পৰা জানিব পৰা মতে, মন্দিৰৰ পৰা ঘৰলৈ উভতি আহোঁতে তিনিজন লোকে এগৰাকী যুৱতীক অপহৰণ কৰি এখন হাবিলৈ লৈ যায়। তাৰ পিছত যুৱতীগৰাকীক দলবদ্ধভাবে ধৰ্ষণ কৰা হয়।
যোৱা ১০ দিনত উৰিষ্যাত ৫টা দলৱদ্ধ ধৰ্ষণ সংঘটিত হৈছে। সেয়ে ৰাজ্যৰ প্ৰশাসনৰ নিৰাপত্তা ব্যৱস্থাক লৈ প্ৰশ্ন উত্থাপন হৈছে। এই ঘটনাই মহিলাৰ সুৰক্ষাক লৈ প্ৰশ্ন উত্থাপন কৰিছে। ৰাজ্যৰ শাসকীয় দল বিজেপিক তীব্ৰ সমালোচনা কৰিছে কংগ্ৰেছে।
আৰক্ষীৰ সূত্ৰ অনুসৰি ২৫ জুন অৰ্থাৎ বুধবাৰে স্থানীয় মন্দিৰৰ পৰা ঘৰলৈ উভতি অহাৰ সময়ত তিনিজন লোকে এগৰাকী যুৱতীক তুলি লৈ যায়। তাৰপিছত নিৰ্জন হাবিলৈ লৈ গৈ দলবদ্ধ ধৰ্ষণ কৰে। এই ঘটনাত আৰক্ষীয়ে বিকাশ পাত্ৰ নামৰ এজন অভিযুক্তক গ্ৰেপ্তাৰ কৰিছে। বাকী দুজন বৰ্তমানেও পলাতক হৈ আছে। দুয়োকে বিচাৰি উলিয়াবলৈ অভিযান অব্যাহত ৰাখিছে আৰক্ষীয়ে।
ইয়াৰ পূৰ্বেও এগৰাকী যুৱতীগৰাকীয়ে এজন বন্ধুৰ সৈতে গোপালপুৰলৈ এটা উৎসৱত অংশগ্ৰহণ কৰিবলৈ আহোতে দহজন যুৱকৰ দলৱদ্ধ ধৰ্ষণৰ বলি হয়।
তাৰ পিছত যোৱা ১৮ জুনত আন এক দলবদ্ধ ধৰ্ষণৰ ঘটনা পোহৰলৈ আহে। কেওঁঝাৰত এগৰাকী ১৭ বছৰীয়া কিশোৰীক দলবদ্ধভাবে ধৰ্ষণ আৰু হত্যা কৰি গছত ওলোমাই থোৱা হয়। আৰক্ষী সূত্ৰৰ পৰা জানিব পৰা মতে, কিশোৰীগৰাকীৰ শৰীৰত আঘাতৰ চিন আছিল। মৃত্যুৰ পূৰ্বেই তাইক ধৰ্ষণ কৰা বুলি অভিযোগ উত্থাপন কৰিছে পৰিয়ালৰ লোকে।
ইয়াৰ পিছদিনা ১৯ জুন তাৰিখে আন এক দলবদ্ধ ধৰ্ষণৰ ঘটনাৰ খবৰ আহিল। এই ঘটনা সংঘটিত হয় ময়ুৰভঞ্জত। অভিযোগ অনুসৰি, সেই নিশা চাৰিজন লোকে এগৰাকী মহিলাৰ ঘৰত প্ৰৱেশ কৰি বলপূৰ্বকভাৱে অপহৰণ কৰে। তাৰ পিছত তেওঁক ধৰ্ষণ কৰা হয়। চাৰিওজন অভিযুক্তই চিনাকি আছিল ভুক্তভোগী মহিলাগৰাকী। ঘটনাৰ সময়ত ঘৰত নাছিল স্বামীৰ লগতে পৰিয়ালৰ অন্যান্য সদস্য।
তাৰ পিছত ২৫ জুনত গঞ্জাম জিলাৰ বেহৰমপুৰত এগৰাকী ১৭ বছৰীয়া কিশোৰীক ধৰ্ষণ কৰাৰ অভিযোগ উত্থাপন হৈছিল এগৰাকী ক্লিনিকৰ মালিকৰ বিৰুদ্ধে।
এই ঘটনাৰ পিছত ৰাজ্যৰ মহিলাসকলৰ সুৰক্ষাক লৈ প্ৰশ্ন উত্থাপন হৈছে। প্ৰশাসনৰ ভূমিকাক লৈও আৰম্ভ হৈছে সমালোচনা। এই ঘটনাক লৈ উদ্বেগ প্ৰকাশ কৰি কটক কংগ্ৰেছৰ বিধায়িকা ছফিয়া ফিৰদৌছে বিজেপি চৰকাৰক গৰিহণা দিয়ে। সৰ্বভাৰতীয় সংবাদ সংস্থা এটাৰ আগত তেওঁ কয় যে, “এয়া অতি দুখ আৰু লজ্জাৰ বিষয়। নতুন চৰকাৰৰ এবছৰৰ ভিতৰত উৰিষ্যাত যিদৰে মহিলাৰ বিৰুদ্ধে অপৰাধ বৃদ্ধি পাইছে, সেয়া বৰ লজ্জাজনক কথা। ইমান ডাঙৰ কাণ্ডৰ পিছতো চৰকাৰে কোনো আক্ষেপ প্ৰকাশ কৰা নাই বা কোনো দৃঢ় পদক্ষেপ গ্ৰহণ কৰা নাই।”
