দীৰ্ঘদিন ধৰি অৱসৰৰ বিষয়ে চৰ্চা চলি থকাৰ পাছত শনিবাৰে আন্তৰ্জাতিক ক্ৰিকেটৰ পৰা অৱসৰ গ্ৰহণ কৰিলে টীম ইণ্ডিয়াৰ প্ৰাক্তন অধিনায়ক মহেন্দ্ৰ সিং ধোনীয়ে।
নিজৰ বৰ্ণিল কেৰিয়াৰত খেলুৱৈগৰাকীয়ে ভাৰতীয় ক্ৰিকেটলৈ বহু অৱদান আগবঢ়াই থৈ গৈছে। গঢ়িছে বহু অভিলেখো।
অৱসৰ লোৱাৰ মুহূৰ্তত মহেন্দ্ৰ সিং ধোনীৰ দখলত থাকি গ’ল ৫টা বিশ্ব অভিলেখ। সেই অভিলেখকেইটা কি এবাৰ চোৱা যাওক।
১) ক্ৰিকেট ইতিহাসত মহেন্দ্ৰ সিং ধোনীয়েই হ’ল একমাত্ৰ অধিনায়ক যাৰ দখলত ৰৈছে এদিনীয়া বিশ্বকাপ(২০১১), টী-২০ বিশ্বকাপ(২০০৭) আৰু চেম্পিয়নছ ট্ৰফী (২০১৩), আইচিচিৰ এই তিনিওটা জয়ৰ খিতাপ।
২) অধিনায়ক হিচাপে ধোনীয়ে ৬খন আন্তৰ্জাতিক টুৰ্ণামেন্টৰ ফাইনেলত অৱতীৰ্ণ হৈছে যাৰ ভিতৰত ৪খনৰ ফাইনেলত ভাৰত বিজয়ী হৈছে।
৩) মহেন্দ্ৰ সিং ধোনীয়ে এদিনীয়া আন্তৰ্জাতিক ক্ৰিকেটত মুঠ ৮৪বাৰ নট আউট আছে যিটো এতিয়ালৈকে বিশ্ব অভিলেখ।
৪) ধোনীয়ে সকলো মিলি ৩৩২খন মেচত ভাৰতক নেতৃত্ব দিছে। ইয়াৰ ভিতৰত ২০০খন এদিনীয়া, ৬০খন টেষ্ট আৰু ৭২খন টী-২০মেচ আছে। এয়াও আন এক বিশ্ব অভিলেখ।
৫) ধোনীয়ে এদিনীয়া ক্ৰিকেটত ১২৩টা ষ্টাম্পিং কৰিছে যিটো বিশ্ব অভিলেখ। সেইদৰে টী-২০মেচত ৩৪টা ষ্টাম্প আউট কৰিছে যিটো সৰ্বাধিক। তিনিওটা ফ’ৰ্মেটত ধোনীয়ে মুঠতে ১৯৫টা ষ্টাম্পিং কৰিছে। এয়াও এক অভিলেখ।