১৯৫০ৰ পিচত প্ৰলয়ংকৰী ভূমিকম্প: মাটি ফুটি ওলাইছে পানী, ৰে’ল দলঙত ফাঁট, আৰু ক’ত কি ক্ষতি?

১৯৫০ চনৰ পিছত ৰাজ্যক আজি জোকাৰি গ’ল আটাইতকৈ শক্তিশালী ভূমিকম্পই।

ভূমিকম্পৰ পিছত সময় বাগৰাৰ লগে লগে ৰাজ্যৰ বিভিন্ন স্থানৰ পৰা বিস্তৰ ক্ষতি সাধনৰ বাতৰি আহিছে। ৬.৭ ৰিখটাৰ স্কেল প্ৰাৱল্যৰ  শক্তিশালী ভূমিকম্পৰ ফলত ভূমিকম্পৰ অভিকেন্দ্ৰ ঢেকিয়াজুলিৰ বিভিন্ন স্থানত মাটি ফুটি পানী ওলাই আছে।

মিছামাৰীৰ পথাৰতো এনেদৰে পানী ওলাই থকা দেখিবলৈ পোৱা গৈছে। ভূমিকম্পৰ জোকাৰণিত পুৰণিগুদামৰ মহা মৃত্যুঞ্জয় মন্দিৰৰো ক্ষতিসাধন হোৱাৰ বাতৰি আহিছে।

গুৱাহাটী মহানগৰীৰ গণেশগুৰী, উলুবাৰী, ভেটাপাৰা, কালাপাহাৰ আদি স্থানত বহু কেইটা অট্টালিকাত বৃহৎ ফাঁট মেলিছে।উলুবাৰীৰ ছিগনেছাৰ এপাৰ্টমেণ্টৰ পানীৰ পাইপ ফাটি যোৱাৰ ফলত বহু কেইটা কোঠা জলমগ্ন হৈ পৰিছে।

Water seeping out from a paddy field in Narayanpur area of Dhekiajuli, the epicenter of the massive 6.7 earthquake in Assam pic.twitter.com/BOD6bfCp6s

— Himanta Biswa Sarma (@himantabiswa) April 28, 2021

ঢেকিয়াজুলীৰ শিংৰী চাহবাগিচাৰ লগতে নাৰায়ণপুৰ অঞ্চলত মাটি ফাঁটি ঘোলা পানী ওলাই অহা পৰিলক্ষিত হৈছে।দৰঙৰ চকীয়াপাৰাত ঘৰৰ বেৰ ভাঙি উমাকান্ত ডেকা নামৰ ৭০ বছৰীয়া এগৰাকী বৃদ্ধ গুৰুতৰ ভাবে আহত হৈছে।   গুৱাহাটীৰ এপল’ হাস্পতাল, এক্সেল কেয়াৰ হাস্পতাল,তাজ ভিভান্তা আদিত ফাঁট মেলিছে।

ৰাজ্যিক দুৰ্যোগ প্ৰশমন বিভাগে ট’লফ্ৰী নম্বৰ মুকলি কৰিছে। জিলা কণ্ট্ৰোল ৰুমৰ নম্বৰ ১০৭৭ আৰু ৰাজ্যিক কণ্ট্ৰোল ৰুমৰ নম্বৰ ১০৭০/১০৭৯।

ইপিনে ভূমিকম্পৰ সময়ত  গুৱাহাটীৰ চন্দ্ৰপুৰত প্ৰসন্ন কলিতা নামৰ ৭০ বছৰীয়া লোক জন অত্যধিক আতংকিত হৈ পৰে আৰু  হৃদযন্ত্ৰৰ ক্ৰিয়া বন্ধ হৈ তেওঁৰ মৃত্যু ঘটে।

নগাঁৱত এটা অট্টালিকাৰ দেৱাল ভাগি পৰাত তলত থকা এটা ঘৰৰ বিস্তৰ ক্ষতি সাধন হয়।ঘৰটোত থকা এটি শিশুৰ কথমপি প্ৰাণৰক্ষা পৰে।

বিশ্বনাথ চাৰিআলিতো বহু ঘৰৰ দেৱালত ফাঁট মেলা দেখা গৈছে। কোকৰাঝাৰ, বঙাইগাঁও আদিৰ পৰাও ভূমিকম্পৰ ফলত ক্ষতিসাধন হোৱাৰ বাতৰি আহিছে।

ৰঙিয়া বঙালীকুচিৰ ৰে’ল দলঙত ভূমিকম্পৰ ফলত বৃহৎ ফাঁট মেলাত ৰে’ল যাতায়াত সাময়িক ভাবে ব্যাহত হৈ পৰে যদিও এতিয়া পুনৰ ৰে’ল চলোৱাৰ দিহা কৰা হৈছে। ভূমিকম্পৰ ফলত ভৈৰৱকুণ্ড পাহাৰৰ মাটি ভয়ংকৰ ৰূপত খহি পৰে। একেদৰে গুৱাহাটীত থকা অসম অয়েলৰ কাৰ্যালয়ৰো বিস্তৰ ক্ষতিসাধন হোৱা পৰিলক্ষিত হৈছে।