এগৰাকী ১৬ বছৰীয়া কিশোৰীক গণধৰ্ষণ কৰি পিতৃ আৰু চাৰিবছৰীয়া ভাগিনীক শিলেৰে মৰিয়াই হত্যা কৰাৰ এক লোমহৰ্ষক কাণ্ড পোহৰলৈ আহিছে।
ছত্তিশগড়ত ক’ৰ্বা জিলাত ছজন লোকে সংঘটিত কৰিছে এই জঘন্য কাণ্ড।
বুধবাৰে ছত্তিশগড় আৰক্ষীয়ে প্ৰকাশ কৰা ঘটনাৰ বিৱৰণীৰ মতে জিলাখনৰ লেমৰু আৰক্ষী থানাৰ অন্তৰ্গত গাধুপ্ৰডা গাঁৱত এগৰাকী ১৬ বছৰীয়া কিশোৰীক ২৯ জানুৱাৰিৰ নিশা ছজন লোকে গণধৰ্ষণ কৰি পিতৃৰ লগতে চাৰি বছৰীয়া ভাগিনীয়েক হত্যা কৰে।
যোৱা বছৰৰ জুলাইৰ পৰা ঘটনাটোৰ মূল অভিযুক্ত শান্তৰাম মঝ’ৱাৰৰ ঘৰত গৰু পালক হিচাপে মৃত লোকজনে কাম কৰি আহিছিল।
ঘটনাৰ দিনা শান্তৰামে মৃত ব্যক্তিজনক ১৬ বছৰীয়া কন্যা আৰু চাৰি বছৰীয়া নাতিনীৰ সৈতে মটৰ চাইকেলেৰে বৰাপানী গাঁৱৰ ঘৰত থ’বলৈ যোৱাৰ পথত কুৰাই নামৰ এখন গাঁৱত মটৰ চাইকেল ৰখাই অন্য অভিযুক্তকেইজনৰ সৈতে সুৰাপান কৰিছিল।
ইয়াৰ পিছতে ছয় অভিযুক্তই ভুক্তভোগী তিনিওকে সমীপৰ গাধুপ্ৰডা নামৰ অৰণ্যই আগুৰি থকা পাহাৰটোলৈ লৈ যায় আৰু পিতৃক আৰু ভাগিনীয়েক আটক কৰি ১৬ বছৰীয়া কিশোৰীগৰাকীক গণধৰ্ষণ কৰে। ধৰ্ষণ কৰাৰ পিছতে তিনিওকে শিলেৰে মূৰত আঘাত কৰি অৰণ্যত এৰি অভিযুক্তকেইজন সেই ঠাইৰ পৰা পলায়ন কৰে।
ইফালে লোকজনৰ পুত্ৰই পিতৃ-ভগ্নীসহ ভাগিনীয়েক নিখোজ হোৱাত আৰক্ষী দাৰস্থ হয়।
পুত্ৰৰ অভিযোগৰ ভিত্তিত আৰক্ষীয়ে অনুসন্ধান চলায় গাধুপ্ৰদা পাহাৰৰ অৰণ্যৰ পৰা দুটা মৃতদেহসহ কিশোৰীগৰাকীক জীৱন্তে উদ্ধাৰ কৰে।
আৰক্ষীয়ে ততাতৈয়াকৈ গুৰুতৰভাৱে আঘাতপ্ৰাপ্ত কিশোৰীগৰাকীক উদ্ধাৰ কৰি স্থানীয় চিকিৎসালয়লৈ প্ৰেৰণ কৰে যদিও চিকিৎসালয় পোৱাৰ পূৰ্বে মৃত্যু ঘটে।
ঘটনাৰ সন্দৰ্ভত ইতিমধ্যে আৰক্ষী ছয় অভিযুক্ত ক্ৰমে শান্তৰাম মাঝ’ৱাৰ(৪৫), আব্দুল জব্বৰ(২৯), অণিল কুমাৰ শাৰ্ঠী(২০), পাৰদেশী ৰাম পানিকা(৩৫), আনন্দ ৰাম পানিকা(২৫) আৰু উমাশংকৰ যাদৱ(২১)ক ভাৰতীয় দণ্ডবিধি আইনৰ ৩০২(হত্যা) ৩৭৬(২)জি(গণধৰ্ষণ) ধাৰা আৰু পস্কো আইনৰ অধীনত গ্ৰেপ্তাৰ কৰিছে।