আমফান ঘূৰ্ণীবতাহৰ ফলত পশ্চিমবংগ বৃহৎ ক্ষতিৰ সন্মুখীন হৈছে। প্ৰতিঘন্টাত ১৬০ৰপৰা ১৮০ কিলোমিটাৰ বেগত অহা এই ধুমুহাই কলকাতা বিমানবন্দৰ পৰ্যন্ত ক্ষতিগ্ৰস্ত কৰি তুলিছে।
ৰাজ্যখনত এই ঘূৰ্ণীবতাহৰ ফলত কিমান ক্ষতিগ্ৰস্ত হৈছে তাৰ প্ৰকৃত হিচাপ ওলাবলৈ এতিয়াও বাকী আছে।
ইপিনে, মুখ্য মন্ত্ৰী মমতা বেনাৰ্জীয়ে দাবী কৰিছে যে আমফানৰ ফলত ৰাজ্যখনত ৭২জন লোকৰ মৃত্যু হৈছে।
মুখ্য মন্ত্ৰী মমতা বেনাৰ্জীয়ে প্ৰধান মন্ত্ৰী নৰেন্দ্ৰ মোদীক ৰাজ্যখন পৰিদৰ্শন কৰাৰ বাবে দাবী জনাইছে।
তেওঁ কয় যে বৰ্তমান অৱস্থা অতি শোচনীয়। ‘’সেয়ে মই প্ৰধান মন্ত্ৰী মোদীক ইয়ালৈ আহি পৰ্যবেক্ষণ কৰাৰ বাবে দাবী জনাইছো।‘’
পশ্চিমবংগৰ মুখ্য মন্ত্ৰী মমতা বেনাৰ্জীয়ে মৃত ব্যক্তিসকলৰ পৰিয়াললৈ ২লাখ টকাৰ সাহায্যৰ কথা ঘোষণা কৰিছে।
মুখ্য মন্ত্ৰীগৰাকীয়ে প্ৰকাশ কৰা মতে, কলকাতাত ১৫জন, হাওড়াত ৭জন, উত্তৰ ২৪পৰগনাত ১৭জন, পূব মিদানপুৰত ৬জন, দক্ষিণ ২৪পৰগনাত ১৮জন, নাদিয়াত ৬জন আৰু হুগলীত ২জন লোকৰ এই ধুমুহাৰ ফলত মৃত্যু হৈছে।
জানিব পৰা মতে, গছ বাগৰি আৰু বজ্ৰপাতৰ ফলত ৭২জন লোকৰ মৃত্যু হৈছে।
উল্লেখযোগ্য যে বুধবাৰে পশ্চিমবংগ আৰু উৰিষ্যাত আমফান ঘূৰ্ণীবতাহে বিধ্বংসী ৰূপ গ্ৰহণ কৰে।
আমফানৰ আটাইতকৈ অধিক প্ৰভাৱ পশ্চিমবংগৰ উত্তৰ ২৪পৰগনাত, দক্ষিণ ২৪পৰগনা, মিদানপুৰ আৰু কলকাতাত পৰিছে।