বুধবাৰে দিল্লীৰ মুখ্যমন্ত্ৰী অৰবিন্দ কেজৰিৱালৰ বাসগৃহত আক্ৰমণ কৰা আঠজন লোকক আজি গ্ৰেপ্তাৰ কৰে দিল্লী আৰক্ষীয়ে। এই আক্ৰমণৰ ঘটনাৰ লগত জড়িত আন কিছু লোকৰ সন্ধান চলাই আছে বুলিও আৰক্ষীয়ে জানিবলৈ দিছে।
আনহাতে আম আদমী পাৰ্টিৰ (আপ) বিধায়ক সৌৰভ ভৰদ্বাজে মুখ্যমন্ত্ৰী অৰবিন্দ কেজৰিৱালৰ চৰকাৰী বাসভৱনত কৰা আক্ৰমণৰ বিৰুদ্ধে দিল্লী উচ্চ ন্যায়ালয়ত আবেদন দাখিল কৰিছে।
আক্ৰমণ সন্দৰ্ভত এক স্বতন্ত্ৰ, নিৰপেক্ষ আৰু সময়সীমাৰ ভিতৰত অপৰাধমূলক তদন্ত কৰিবলৈ এক বিশেষ তদন্ত দল (SIT) গঠন কৰিবলৈ আহ্বান জনাই এই আবেদন দাখিল কৰা হৈছে।
সৌৰভ ভৰদ্বাজে আবেদনখনত বিজেপিৰ দলীয় কৰ্মীয়ে কেজৰিৱালৰ বাসগৃহত আক্ৰমণ কৰাৰ অভিযোগ উত্থাপন কৰিছিল। লগতে এই আক্ৰমণত দিল্লী আৰক্ষীৰো মৌন সহযোগ আছে বুলি অভিযোগ কৰিছে বিধায়কজনে।
মুখ্যমন্ত্ৰী কেজৰিৱালৰ বাসগৃহত হোৱা আক্ৰমণৰ পিছতে দিল্লীৰ উপ মুখ্যমন্ত্ৰী মনীষ চিছোদিয়াই বিজেপিয়ে অৰবিন্দ কেজৰিৱালক হত্যাৰ ষড়যন্ত্ৰ কৰিছে বুলি অভিযোগ কৰে।
আন এজন আপ নেতা সৌৰভ ভৰদ্বাজেও দাবী কৰে যে বিজেপিয়ে মুখ্যমন্ত্ৰী অৰবিন্দ কেজৰিৱালক হত্যা কৰিবলৈ চেষ্টা কৰি আছে।
আনহাতে আক্ৰমণ সন্দৰ্ভত প্ৰতিক্ৰিয়া ব্যক্ত কৰি কেজৰিৱালে কয় যে দেশৰ বাবে তেওঁ প্ৰাণ ত্যাগ কৰিব পাৰে। “কেজৰিৱাল গুৰুত্বপূৰ্ণ নহয়, এই দেশ গুৰুত্বপূৰ্ণ। মই দেশৰ বাবে মৰিব পাৰোঁ।”— তেওঁ কয়।
উল্লেখ্য যে দ্য কাশ্মীৰ ফাইলছৰ প্ৰচাৰৰ বাবে বিধানসভাত বিজেপিক কৰা সমালোচনাৰ বিৰোধিতা কৰি বুধবাৰে কেজৰিৱালৰ বাসগৃহৰ সন্মুখত বিজেপি সাংসদ তেজস্বী সূৰ্যৰ নেতৃত্বত এদল লোকে প্ৰতিবাদ সাব্যস্ত কৰিছিল।
প্ৰতিবাদৰ মাজতে বিজেপি কৰ্মীসকলে মুখ্যমন্ত্ৰী কেজৰিৱালৰ বাসগৃহত আক্ৰমণ কৰা দৃশ্য চিচিটিভি কেমেৰাত ধৰা পৰিছিল।
