অজিত কুমাৰ ভূঞাই শুকুৰবাৰে ৰাজ্যসভা নিৰ্বাচনত অসমৰ বিৰোধী ৰাজনৈতিক শিৱিৰৰ উমৈহতীয়া প্ৰাৰ্থীৰূপে মনোনয়ন পত্ৰ দাখিল কৰে।
ভূঞাই মনোনয়ন পত্ৰ দাখিল কৰা সময়ত সংগ দিয়ে প্ৰাক্তন মুখ্য মন্ত্ৰী তৰুণ গগৈ, এ আই ইউ ডি এফ মুৰব্বী বদৰুদ্দিন আজমলে।
প্ৰদেশ কংগ্ৰেছ সভাপতি ৰিপুণ বৰা, বিৰোধী দলপতি দেৱব্ৰত শইকীয়া, বিধায়ক ৰেকিবুদ্দিন আহমেদ, মনজিৎ মহন্ত, হাইদৰ হুছেইন, লক্ষ্মীনাথ তামুলী আদিও ভূঞাৰ মনোনয়ন পত্ৰ দাখিলৰ সময়ত উপস্থিত আছিল।
মনোনয়ন পত্ৰ দাখিল কৰা সময়ত প্ৰাক্তন মুখ্য মন্ত্ৰী তৰুণ গগৈ আৰু বদৰুদ্দিন আজমলক হাতে-হাত ধৰি আগবঢ়া দেখা গ’ল।
মনোনয়ন পত্ৰ দাখিল কৰি প্ৰাৰ্থী অজিত কুমাৰ ভূঞাই তেওঁৰ বিজয় নিশ্চিত বুলি দাবী কৰে।
“সকলো বিৰোধী পক্ষৰ বিধায়কৰ উপস্থিতিয়ে এক শক্তিশালী বিৰোধী পক্ষৰ উমান দিছে। বিৰোধী উমৈহতীয়া প্ৰাৰ্থী হিচাপে জয় নিশ্চিত,” ভূঞাই কয়।
আনহাতে, আন এগৰাকী জ্যেষ্ঠ সাংবাদিক অতনু ভূঞাৰ মনোনয়ন পত্ৰ সংগ্ৰহৰ সন্দৰ্ভত ভূঞাই প্ৰতিক্ৰিয়া প্ৰকাশ কৰি কয়, “সেয়া সকলোৱে পাৰে। তাত মোৰ ক’ব লগা একো নাই। সেইটো আহক সময়ত গম পোৱা যাব।”
অসমত কোন বেছি সাম্প্ৰদায়িক সেয়া যাৰ জ্ঞান আৰু বুদ্ধি বেছি আছে তাক কোৱাৰ প্ৰয়োজন নাই বুলি উল্লেখ কৰি ভূঞাই কয়, “এ আই ইউ ডি এফ যদি সাম্প্ৰদায়িক, তেন্তে তাৰ বিৰুদ্ধে তেওঁলোকে ব্যৱস্থা লওক আইনগতভাৱে। সংবিধানৰ নামত শপত খাই সাম্প্ৰদায়িক ৰাজনীতি তেওঁলোকে কৰিছে। এ আই ইউ ডি এফলৈ আঙুলি টোঁৱাই মেৰুকৰণ আৰু বিভাজনৰ ৰাজনীতি কৰিছে।”
ভূঞাই লগতে কয় যে অগপৰ সুবিধাবাদী চৰিত্ৰ ওলাই পৰিছে। কাৰ লগত তেওঁলোকক ৰিজাম সেইটোৱে ভাবিবলৈ টান হৈছে বুলি উল্লেখ কৰি ভূঞাই কয়, “কাৰণ মানুহক মূৰ্খ বুলি ভাবি আঞ্চলিকতাবাদক ধ্বংস কৰি ৰাজনীতি কৰিছে। অগপ এতিয়া নিজে বিজেপিত জাহ গৈছে।”
বিজেপিলৈ কংগ্ৰেছৰ এগৰাকী বিধায়ক যাব বুলি হিমন্ত বিশ্ব শৰ্মাই কৰা মন্তব্য প্ৰদেশ কংগ্ৰেছ সভাপতি ৰিপুণ বৰাই নাকচ কৰে।
আনহাতে প্ৰাক্তন মুখ্য মন্ত্ৰী তৰুণ গগৈয়ে কয়, “হিমন্ত এতিয়া সাম্প্ৰদায়িক ক’ৰণা ভাইৰাছ। যিয়ে অসমখন ভাগ ভাগ কৰিব বিচাৰিছে।”
অজিত কুমাৰ ভূঞাক কেৱল কংগ্ৰেছ বা এ আই ইউ ডি এফৰে নহয় সমগ্ৰ অসমৰ বুদ্ধিজীৱী আৰু কা-বিৰোধী প্ৰাৰ্থী বুলি গগৈয়ে অভিহিত কৰে।
