ৰাষ্ট্ৰপতিয়ে ৰাজ্য সভাৰ সদস্যপদৰ বাবে কৰা মনোনয়ন দেশৰ প্ৰাক্তন মুখ্য ন্যায়াধীশ ৰঞ্জন গগৈয়ে গ্ৰহণ কৰিছে।
প্ৰাক্তন মুখ্য ন্যায়াধীশগৰাকীয়ে কিয় এই সিদ্ধান্ত গ্ৰহণ কৰিলে সেই লৈ সংবাদ মাধ্যমত কিছু বক্তব্য আগবঢ়াইছে।
“মই ইয়াক গ্ৰহণ কৰিছো কাৰণ মোৰ এক দৃঢ় বিশ্বাস আছে যে আইনপালিকা আৰু ন্যায়পালিকাই দেশ নিৰ্মাণৰ বাবে কিছু সময়ত একেলগে কাম কৰিবই লাগিব,” তেওঁ কয়।
ৰাজ্য সভাত তেওঁৰ উপস্থিতি ন্যায়পালিকাৰ দৃষ্টিভংগী আইনপালিকাৰ সন্মুখত প্ৰদৰ্শনৰ এক সুযোগ হ’ব বুলি তেওঁ মন্তব্য কৰে।
প্ৰাক্তন মুখ্য ন্যায়াধীশগৰাকীয়ে অৱশ্যে ৰাজ্য সভাৰ সদস্যৰূপে শপতগ্ৰহণৰ পিছতহে এই বিষয়ে অধিক বিস্তাৰিতভাৱে সদৰী কৰিব বুলি মন্তব্য কৰে।
“প্ৰথমে মোক শপত ল’বলৈ দিয়ক, তাৰ পিছত মই কিয় ইয়াক গ্ৰহণ কৰিলো সেয়া বিস্তাৰিতভাৱে মিডিয়াক জনাম,” তেওঁ কয়।
দেশৰ মুখ্য ন্যায়াধীশৰ আসনত বহা প্ৰথম অসমীয়াগৰাকীয়ে ২০১৯ চনৰ ১৭ নৱেম্বৰত অৱসৰ গ্ৰহণ কৰিছিল।
অৱসৰৰ পূৰ্বে তেওঁৰ অধ্যক্ষতাত গঠিত বিচাৰপীঠে অযোধ্যা ভূমি বিবাদ গোচৰৰ ঐতিহাসিক ৰায়দান কৰিছিল।
