COVID-19 পজিটিভ চিনাক্ত অসমৰ কৰিমগঞ্জৰ ব্যক্তিজন বহুসংখ্যক লোকৰ সংস্পৰ্শলৈ আহিছিল বুলি জানিব পৰা গৈছে।
বৰ্তমান শিলচৰ চিকিৎসা মহাবিদ্যালয় আৰু হস্পিটেলত চিকিৎসাধীন ব্যক্তিজনে কৰিছিল দীঘলীয়া ৰেলযাত্ৰা, থাকিছিল গুৱাহাটীৰ এঘৰত আৰু দিল্লীৰ হোটেলত।
তাৰোপৰি খবৰ মতে ৫২ বছৰীয়া ব্যক্তিজনৰ আছে এটা বৃহৎ পৰিয়াল, তেওঁ ১০টা সন্তানৰ পিতৃ।
গুৱাহাটীৰ আঠগাঁৱৰ ৰহমান উপাধিৰ এঘৰ লোকৰ সৈতেও দিল্লীৰ পৰা উভতি অহাৰ পিছত দুদিন কটাইছিল ব্যক্তিজনে।
দিল্লীত ৫ মাৰ্চৰ পৰা তেওঁ জ্যোতি নামৰ এক হোটেলত আছিল৷ তাৰপৰা জামে মছজিদৰ লগতে নিজামুদ্দিনলৈকো গৈছিল৷
১৩ মাৰ্চত তেওঁ ৰাজধানী এক্সপ্ৰেছেৰে গুৱাহাটীৰ পৰা বদৰপুৰলৈ গৈছিল৷ দিল্লী-গুৱাহাটী-বদৰপুৰ যাত্ৰাত তেওঁৰ সৈতে আন এজন লোকো আছিল৷
হঠাৎ জ্বৰ হোৱাৰ বাবে ১৭ মাৰ্চত তেওঁ কাছাৰ কেন্সাৰ হাস্পতালত ভৰ্তি হৈছিল আৰু পিছদিনা চিকিৎসালয় এৰিছিল।
কিন্তু পিছত ২৯ মাৰ্চৰ ৰাতি তেওঁ পুনৰ শিলচৰ চিকিৎসা মহাবিদ্যালয় আৰু হস্পিটেলত ভৰ্তি হয়। আৰু তাতে তেওঁৰ COVID-19 পজিটিভ বুলি ধৰা পৰে।
গতিকে ইমান দীঘলীয়া যাত্ৰাত তেওঁ বৃ্হৎসংখ্যক লোকৰ সংস্পৰ্শলৈ অহাটো নিশ্চিত হৈ পৰিছে আৰু এইসকল লোকক চিনাক্ত কৰাটোও জৰুৰী হৈ পৰিছে।
তাৰোপৰি তেওঁ নিজৰ বৃহৎ পৰিয়ালটোৰ সকলো সদস্যৰ সংস্পৰ্শলৈ অহাটোও নিশ্চিত।
শিলচৰ চিকিৎসা মহাবিদ্যালয় হাস্পতাল আৰু পুনেৰ National Institute of Virologyত ব্যক্তিজনৰ নমুনা পৰীক্ষাৰ কৰাৰ পিছত তেওঁ COVID-19 আক্ৰান্ত বুলি নিশ্চিত হৈছে।
স্বাস্থ্য মন্ত্ৰী হিমন্ত বিশ্ব শৰ্মাই সদৰী কৰা মতে ব্যক্তিজনৰ অৱস্থা বৰ্তমান সুস্থিৰ আৰু তেওঁৰ চিকিৎসা চলি আছে।
দেশত কৰ’নাভাইৰাছ আক্ৰান্তৰ সংখ্যা মঙলবাৰে ১৩৯৭লৈ বৃদ্ধি পাইছে। আক্ৰান্ত ৩৫ গৰাকী লোক মৃত্যুমুখত পৰিছে।
স্বাস্থ্য আৰু পৰিয়াল কল্যাণ মন্ত্ৰ্যালয়ৰ তথ্য মতে কৰ’নাভাইৰাছত আক্ৰান্ত দেশৰ ১২৪ গৰাকী ৰোগী সুস্থ হৈছে আৰু তেওঁলোকক চিকিৎসালয়ৰ পৰা যাবলৈ দিয়া হৈছে।
যোৱা ২৪ ঘণ্টাত দেশত নতুনকৈ ২০০ গৰাকী কৰ’নাভাইৰাছ আক্ৰান্ত চিনাক্ত হৈছে।
