কৰ’না ৰোগীৰ মৃতদেহৰ পৰা কৰ’নাভাইৰাছ সংক্ৰমণৰ প্ৰথমটো ঘটনা থাইলেণ্ডত নিশ্চিত কৰা হৈছে।
বাতৰি মতে, এটা মৃতদেহৰ পৰা এগৰাকী স্বাস্থ্য কৰ্মীলৈ কৰ’নাভাইৰাছ বিয়পিছিল।
জাৰ্নেল অৱ ফৰেনছিক এণ্ড লীগেল মেডিচিন ষ্টাডি নামৰ জাৰ্নেলৰ উদ্ধৃতিৰে BuzzFeed Newsএ এই বাতৰি প্ৰকাশ কৰিছে।
মৃতদেহত কিমান সময়লৈকে কৰ’নাভাইৰাছ থাকে সেই কথা এতিয়াও জানিব পৰা হোৱা নাই।
সেয়ে বিশেষজ্ঞসকলে মৃতদেহৰ সৎকাৰৰ লগত জৰিত ব্যক্তিসকলে বিশেষ সাৱধানতা ল’ব লাগে বুলি মন্তব্য কৰিছে।
ক’ভিড-১৯ ৰোগী বা মৃতদেহৰ সৈতে ওচৰলৈ আহোতে প্ৰত্যকেই পি পি ই ব্যৱহাৰ কৰিব লাগে, এগৰাকী বিশেষজ্ঞই কয়।
উল্লেখযোগ্য যে অসমত ক’ভিড-১৯ত মৃত্যু হোৱা প্ৰথমজন ৰোগীৰ শেষকৃত্যত স্বাস্থ্য বিভাগে বিশেষ সতৰ্কতা গ্ৰহণ কৰিছিল।
থাইলেণ্ডত এতিয়ালৈকে ২৬১৩গৰাকী ক’ভিড-১৯ ৰোগী চিনাক্ত হৈছে আৰু এতিয়ালৈকে ৪১ গৰাকীৰ মৃত্যু হৈছে।
দেশখনত এতিয়ালৈকে ১৪০৫ গৰাকী ক’ভিড-১৯ ৰোগী সুস্থ হৈ ঘৰলৈ উভটিছে।
ইবলাৰ দৰে ৰোগৰ ক্ষেত্ৰতো মৃতদেহৰ পৰা ৰোগ সংক্ৰমণ হোৱা দেখা গৈছিল।
বিশ্ব স্বাস্থ্য সংস্থাই হেপাটাইটিছ, টিবি আৰু কলেৰা ৰোগীৰ মৃতদেহৰ ক্ষেত্ৰতো সাৱধানতা অৱলম্বনৰ বাবে নিৰ্দেশনা দিয়ে।
