ক’ৰ’না ভাইৰাছৰ সংক্ৰমণৰ সময়তো দেশৰ নিৰাপত্তাৰ স্বাৰ্থত সম্পূৰ্ণৰূপে সষ্টম হৈ আছে ভাৰতীয়া সেনাবাহিনী।
ভাৰতীয় সেনা বাহিনীৰ অভিযানকাৰী দলৰ সৈতে হোৱা মুখামুখি সংঘৰ্ষত শনিবাৰে ৰাতিপুৱা জম্মু-কাশ্মীৰৰ পুলৱামাৰ আৱন্তীপুৰ অঞ্চলত দুগৰাকী সন্ত্ৰাসবাদীৰ লগতে এগৰাকী সন্ত্ৰাসবাদীৰ লিংকমেন নিহত হয়।
উল্লেখযোগ্য যে, ভাৰতীয় সেনাবাহিনীৰ ৫০ ৰাষ্ট্ৰীয় ৰাইফলৰ কুমাও ৰেজিমেণ্ট, চি আৰ পি এফৰ ১৩০ বেটেলিয়ন আৰু জম্মু-কাশ্মীৰ আৰক্ষীয়ে আজি পুৱতি নিশা অভিযান আৰম্ভ কৰে আৰু এই অভিযানৰ সময়তে অঞ্চলটোত বাহৰ পাতি থকা সন্ত্ৰাসবাদীৰ দলটোৱে অভিযানকাৰী দলটোক উদ্দেশ্যি গুলীবৰ্ষণ কৰে।
অভিযানকাৰী দলটোৱে প্ৰতি উত্তৰ দিয়াত দুগৰাকী সন্ত্ৰাসবাদী আৰু এজন লিংকমেন নিহত হয়।
কিছুদিন পূৰ্বেও ভাৰতীয় সেনাবাহিনীয়ে কাশ্মীৰত চাৰিগৰাকী সন্ত্ৰাসবাদীক গুলীয়াই নিহত কৰিছিল।
জম্মু-কাশ্মীৰতো দেশৰ অন্য প্ৰান্তৰ দৰে ক’ৰ’নাৰ সংক্ৰমণ ৰোধৰ বাবে ল’কডাউন চলি আছে এই ল’কডাউনৰ সময়ত ভাৰতীয় সেনা বাহিনীৰ সফল অভিযানে অঞ্চলটোত সন্ত্ৰাসবাদীৰ মনোবল ভাঙি পেলাইছে।
