সমগ্ৰ ৰাজ্যতে নিষিদ্ধ হোৱা নাই গাহৰি মাংস বিক্ৰী। ৰাজ্যৰ পশুপালন বিভাগে এক জাননী যোগে এই কথা প্ৰকাশ কৰিছে।
ৰাজ্যৰ ৬খন জিলাতহে গাহৰি মাংসৰ বিক্ৰী আৰু সৰবৰাহ বন্ধ থাকিব। ধেমাজি, উত্তৰ লখিমপুৰ, বিশ্বনাথ, ডিব্ৰুগড় আৰু শিৱসাগৰত নিষিদ্ধ গাহৰি বিক্ৰী আৰু সৰবৰাহৰ ব্যৱস্থা।
পশুপালন বিভাগৰ মুখ্য সচিব ৰাজেশ প্ৰসাদে শনিবাৰে নিশা এক জাননীৰ জৰিয়তে প্ৰকাশ কৰিছে এই কথা।
উল্লেখযোগ্য যে এই জিলাকেইখনত এইপৰ্যন্ত প্ৰায় ২০০০ গাহৰি swine fever (গাহৰি জ্বৰ)ত আক্ৰান্ত হৈ মৃত্যু মুখত পৰিছে। ইতিমধ্যে মৃত গাহৰিৰ তেজৰ নমুনা ভূপাললৈ পৰীক্ষাৰ বাবে প্ৰেৰণ কৰা হৈছে।
শনিবাৰে কৃষি মন্ত্ৰী অতুল বৰাই swine feverৰ প্ৰতি লক্ষ্য ৰাখি ৰাজ্যত গাহৰি মাংসৰ বিক্ৰীত নিষেধাজ্ঞা জাৰি কৰিছিল। অৱশ্যে নিশালৈ পশুপালন বিভাগৰ মুখ্য সচিব ৰাজেশ প্ৰসাদে এই নিষেধাজ্ঞা কেৱল ৬খন জিলাতহে প্ৰযোজ্য হ’ব বুলি জনায়।
পশুপালন বিভাগে ৰাজ্যৰ সমূহ গাহৰি ফাৰ্মত সতৰ্কতামূলক ব্যৱস্থা গ্ৰহণৰ বাবে নিৰ্দেশ দিছে। যদি গাহৰিৰ অস্বাভাৱিক আচৰণ বা তমোময় জ্বৰ হোৱা গম পাই তেন্তে মহকুমা বা জিলা প্ৰশাসনক আৰু পশু চিকিৎসালয়ত জনোৱাৰ নিৰ্দেশ।
