লকডাউনৰ মাজতে ভুটান ৰাষ্ট্ৰৰ ভাংতাৰৰ কাৱৈপানী অঞ্চলত কৰ্মৰত অসমৰ ১০ জনকৈ শ্ৰমিক পাহাৰ বগাই, নৈ পাৰ হৈ খোজকাঢ়ি আহি বাক্সা জিলাৰ ভাৰত-ভুটান সীমান্তৰ কাউলীত দেওবাৰে সন্ধিয়া প্ৰৱেশ কৰাৰ পিছত কাউলি অঞ্চলত তীব্ৰ আতংকৰ সৃষ্টি হয়।
ইয়াৰে ৫ গৰাকী লোক শোণিতপুৰ জিলাৰ আৰু ৫ গৰাকী লোক নাগ্ৰীজুলি উন্নয়ন খণ্ডৰ অধীনৰ কাউলীৰ।
ভুটানৰ ভাংটাৰৰ কাৱৈ পানীত কৰ্মৰত এঘাৰ গৰাকী শ্ৰমিকে ৰাবিবাৰে পুৱতি নিশা ৪-০০ বজাৰ পৰা পাহৰুৱা পথেৰে খোজকাঢ়ি আহি কালি সন্ধিয়া ১০ গৰাকী শ্ৰমিক উপস্থিত হৈছিল নাগ্ৰীজুলিৰ কাউলীত।
এঘাৰ গৰাকীৰ ভিতৰত পথতে এগৰাকী শ্ৰমিক নিখোজ হৈ পৰে। লোক কেইজন খোজ কাঢ়ি আহি কাউলীত উপস্থিত হোৱাৰ পিছত অঞ্চলটোত ক’ৰ’নাৰ আতংকত হাহাকাৰ অৱস্থাৰ সৃষ্টি হয়।
স্থানীয় সচেতন ব্যক্তি সকলে প্ৰথমে লোক কেইজনক আগচি ধৰি সামাজিক দূৰত্ব বজাই ৰাখি কাউলী তৰুণগাঁও প্ৰাথমিক বিদ্যালয়ত ৰাখি থৈ আৰক্ষী প্ৰশাসন আৰু চিকিৎসা কৰ্মীক খবৰ দিয়ে।
খবৰ পাই নিশা ঘটনাস্থলীত তামুলপুৰ আৰক্ষী থানাৰ ভাৰপ্ৰাপ্ত বিষয়া আৰক্ষী পৰিদৰ্শক অসীম বৰা আৰু কুমাৰীকাটা আৰক্ষী চকীৰ ভাৰপ্ৰাপ্ত বিষয়া নিপন গগৈ কাউলীত উপস্থিত হৈ ঘটনাৰ বুজ লয়। চিকিৎসকৰ দল এটাও কাউলীৰ তৰুণগাঁৱত উপস্থিত হৈ শ্ৰমিক কেইজনৰ স্বাস্থ্যৰ বুজ লয়।
পিছত লোক কেইজনক নিশাই ১০৮ এম্বুলেন্সৰ দ্বাৰা নাগ্ৰীজুলি আদৰ্শ চিকিৎসালয়লৈ প্ৰেৰণ কৰি আটাইকেইজনকে কোৱাৰেণ্টাইন কৰা হয়।
নাগ্ৰীজুলি আদৰ্শ চিকিৎসালয়ৰ ভাৰপ্ৰাপ্ত বিষয়া ডাঃ মনোহৰ দাসে জনোৱা মতে নিশা প্ৰায় ১০ মান বজাত ভূটানৰ পৰা অহা শ্ৰমিক কেইজনক কোৱাৰেণ্টাইন কৰা হৈছে। তেওঁলোকে অনাহাৰে থাকি পাহাৰ বগাই, নৈ পাৰ হৈ খোজকাঢ়ি অহা বাবে যথেষ্ট দুৰ্বল হৈ পৰিছে আৰু আটাইকেইজনকে প্ৰাথমিক চিকিৎসা প্ৰদান কৰি কোৱাৰেণ্টাইন কৰা হয় আৰু খাদ্যৰ যোগান ধৰা হয়।
বৰ্তমান আটাইকেইজন সুস্থ হৈ আছে বুলিও চিকিৎসক ডাঃ দাসে সংবাদ মাধ্যমৰ আগত প্ৰকাশ কৰিছে।
কোৱাৰেণ্টাইনত থকা লোক কেইজন হৈছে শোণিতপুৰ জিলাৰ ৰাম দয়াল পাইক, ৰূপেছ ওৰাং, পাপলু ভূমিজ, আমজান খান আৰু বাক্সা জিলাৰ কাউলীৰ মহেশ্বৰ বিশ্বাস, সম্ভূ বিশ্বাস, হিৰো বৈশ্য, অখিল বিশ্বাস, উদয় বৈশ্য আৰু প্ৰভাত বাক্সি।
উল্লেখ্য যে ভুটান ৰাষ্ট্ৰৰ পৰা মুঠ এঘাৰ জন শ্ৰমিক অসমলৈ উভতি আহিছিল যদিও এগৰাকী শ্ৰমিক দলটোৰ পৰা নিখোজে হৈ আছিল বুলি শ্ৰমিকৰ দলটোৱে প্ৰকাশ কৰিছিল।
নিখোজ হোৱা শ্ৰমিকজনক আৰক্ষীয়ে বিচাৰি আছিল যদিও আজি দিনৰ ভাগত শ্ৰমিকজন নিজে কাউলীত আহি উপস্থিত হয় আৰু তেওঁকো নাগ্ৰীজুলি আদৰ্শ চিকিৎসালয়লৈ কোৱাৰেণ্টাইনৰ বাবে প্ৰেৰণ কৰা হয়। এই লোকজনৰ নাম হ’ল খুদাং মুন্ডা।
