বন্ধ হোৱা নাই প্ৰতিদিন সংবাদ গোষ্ঠীৰ অন্যতম সাপ্তাহিক কাকত ‘সাদিন’, এই কথা স্পষ্ট কৰিলে সাদিন-প্ৰতিদিন গোষ্ঠীৰ কাৰ্য্যধ্যক্ষগৰাকীয়ে।
নৰ্থ-ইষ্ট নাওলৈ প্ৰেৰণ কৰা এক বিজ্ঞপ্তিৰ জৰিয়তে কাৰ্য্যধক্ষ্য গৰাকীয়ে কয়, ‘সোমবাৰে নিশাৰ পৰা হঠাৎ বিভিন্ন সামাজিক মাধ্যমত সাদিন বন্ধ হোৱা বুলি ব্যাপকভাৱে প্ৰচাৰ হোৱা এটা খবৰে ‘সাদিন-প্ৰতিদিন’ গোষ্ঠীৰ শুভাকাংক্ষীমহলক উৎকন্ঠিত আৰু বেদনাহত কৰিছে।’
উল্লেখযোগ্য যে, ক’ৰ’নাৰ আৱিৰ্ভাৱ আৰু ইয়াৰ পাৰ্শ্বক্ৰিয়াই বিশ্বজুৰি ছপামাধ্যমৰ লগতে অন্যান্য ক্ষেত্ৰলৈ সংকট নমাই অনাৰ সময়তে কালি চ’ছিয়েল মিডিয়াত সাদিনৰ সম্পাদক অনুৰাধা শৰ্মা পুজাৰীকে ধৰি কাকতখনত কৰ্মৰত ১৫ গৰাকী কৰ্মচাৰীক তিনিমাহৰ দৰমহা দি সোমবাৰে অৱ্যাহতি দিয়া হৈছে বুলি এটা পোষ্ট ভাইৰেল হৈ পৰিছিল।
ইয়াৰ পাছতে এক গোহাৰিৰ জৰিয়তে সংবাদ গোষ্ঠীটোৱে প্ৰতিক্ৰিয়া প্ৰকাশ কৰে।
‘‘এনে এক অজ্ঞাত উদ্দেশ্যত প্ৰচাৰ কৰা খবৰত আমি স্তম্ভিত আৰু মৰ্মাহত হৈছো। সাদিন-প্ৰতিদিন গোষ্ঠী অসমৰ সংবাদ জগতৰ এক সম্ভ্ৰান্ত পৰিচয় আৰু সু-সংহত গোষ্ঠী। সেয়েহে প্ৰতিদিনৰ পৰা সাদিনকক বিচ্ছিন্ন কৰি এইখন বন্ধ কৰি দিয়াৰ খবৰ মুখৰোচকভাৱে প্ৰকাশ কৰি গোষ্ঠীটোক অৱমূল্যায়ণ কৰাৰ লগতে শুভাকাংক্ষী মহলক হতাশ কৰাৰ অপচেষ্টা কোনোবাই চলালেও সেয়া সত্য নহয়,’’ সংবাদগোষ্ঠীটোৰ তৰফৰ পৰা এনেদৰে স্পষ্টীকৰণ দিয়া হয়।
ইপিনে, প্ৰতিদিন গোষ্ঠীৰ এক সুত্ৰই আমাক জনোৱা অনুসৰি প্ৰতি দেওবাৰে প্ৰতিদিন কাকতৰ সৈতে উপলব্ধ হ’ব সাদিন কাকতখন।
উল্লেখযোগ্য যে, সাদিন কাকতখন বন্ধ হ’ব বুলি চ’ছিয়েল মিডিয়াত প্ৰচাৰ হোৱাৰ পাছতে কাকতখনৰ পাঠক আৰু নিয়মীয়া লেখক-লেখিকা সকলে দুখ প্ৰকাশ কৰা পৰিলক্ষিত হৈছিল। কিন্তু এতিয়া চিন্তাৰ কোনো কাৰণ নাই তেওঁলোকে নিয়মীয়াকৈ কাকতখনৰ বাবে লেখা-মেলা পঠিয়াই থাকিব পাৰাৰ লগতে পাঠক সকলেও নিজৰ কপিটো লাভ কৰিব।
