১২ মে’ অৰ্থাৎ কাইলৈৰ পৰা দেশত যাত্ৰীবাহী ৰে’লৰ চলাচল আৰম্ভ হ’ব। দেশৰ ৰাজধানী নতুন দিল্লীৰ পৰা এই যাত্ৰীবাহী ৰে’লসেৱা আৰম্ভ হ’ব।
উত্তৰ-পূব সীমান্ত ৰে’লৱেৰ অধীনৰ দুখন যাত্ৰীবাহী ৰে’ল চলাচল কৰিব। মূলত বিভিন্ন স্থানত আৱদ্ধ হৈ থকা প্ৰব্ৰজিত শ্ৰমিক সকলক ঘৰলৈ ওভটাই অনাৰ বাবে দিল্লীৰ পৰা ডিব্ৰুগড় আৰু নতুন দিল্লীৰ পৰা আগৰতলালৈ যাত্ৰীবাহী ৰে’ল দুখন চলিব।
উত্তৰ-পূব সীমান্ত ৰে’লৱেৰ মুখ্য জনসম্পৰ্কৰক্ষী বিষয়া শুভানন চন্দ জনোৱা মতে, আজি আবেলি ৪ বজাৰ পৰা আই আৰ চি টি চিত যাত্ৰী সকলে টিকত বুকিং কৰিব পাৰিব।
বিষয়া গৰাকীয়ে কেবল অনলাইন পদ্ধতিতহে ৰে’ল টিকত সমূহ উপলব্ধ হ’ব বুলিও জানিবলৈ দিয়ে।
আনহাতে, ৰে’লগাড়ী সমূহৰ ষ্টপেজ, ভাড়া এই সন্দৰ্ভত এতিয়ালৈ কোনোধৰণৰ স্পষ্ট নীতি- নিৰ্দেশনা অহা নাই বুলিও লগতে উল্লেখ কৰে।
‘‘শ্ৰমিক ৰে’ল সমূহত ৰাজ্য চৰকাৰে ভাড়া আদায় দিছিল কিন্তু এই যাত্ৰীবাহী ৰে’লত যাত্ৰী সকলে ব্যক্তিগতভাৱে ভাড়া আদায় দিব লাগিব। সামাজিক দূৰত্ব অটুট ৰখিবৰ বাবে বিশেষ শ্ৰমিক ৰে’ল সমূহত মাজৰ আসনৰ টিকত দিয়া হোৱা নাছিল,’’ শুভানন চন্দ এইদৰে জনায়।
‘‘স্বাস্থ্যজনিত কাৰণত যিসকল যাত্ৰীৰ টিকট থাকিব তেওঁলোকক হৈ ৰে’লৱে ষ্টেচনলৈ আহিব দিয়া হ’ব আৰু ষ্টেচনত সকলোকে স্ক্ৰিনিং কৰা হ’ব ৷ স্ক্ৰিনিঙত কাৰোবাক শৰীৰত যদি বিশেষ লক্ষণ দেখা পোৱা যায় সেইসকল যাত্ৰীয়ে যাত্ৰা কৰিব নোৱাৰিব,’’ তেওঁ লগতে কয়।
তদুপৰি, যাত্ৰী সকলে যাত্ৰা কালত মাস্ক পিন্ধাটো বাধ্যতামুলক হোৱাৰ লগতে ষ্টেশ্যন সমূহ প্ৰতিদিনে চেনিটাইজ কৰা হ’ব বুলিও শুভানন চন্দই জনায়।
উল্লেখযোগ্য যে, জনসাধৰণক সজাগ কৰাৰ উদ্দেশ্যে প্ৰতিখন ৰে’ল আৰু প্ৰতিটো ষ্টেশ্যনত পোষ্টাৰিং কৰা হ’ব লগতে ৰে’লসমূহত ৰে’ল আৰক্ষী আৰু জিআৰপিও থাকিব আৰু যদি যাত্ৰীয়ে নিয়ম ভংগ কৰে শাস্তিমূলক ব্যৱস্থা গ্ৰহণ কৰা হ’ব বুলিও জনসম্পৰ্কৰক্ষী বিষয়া গৰাকীয়ে কয়।
ক’ৰ’না মহামাৰীৰ সংক্ৰমণৰ বাবে যাত্ৰীবাহী ৰে’লৰ চলাচল বন্ধ হৈ আছিল। ১ মে’ৰ পৰা ৰাজ্য চৰকাৰে তালিকভূক্ত কৰা লোক সকলক নিজ নিজ গৃহ ৰাজ্যলৈ ঘূৰাই অনাৰ বাবে বিশেষ ৰে’ল চলোৱাৰ সিদ্ধান্ত গ্ৰহণ কৰা হৈছিল।
উত্তৰ পূবলৈ দুখন বিশেষ শ্ৰমিক ৰে’ল আহি আছে। এখন বেংগালুৰুৰ পৰা আগৰতলালৈ আৰু আনখন চেন্নাইৰ পৰা মনিপুৰলৈ ৷
১৩ মে’ত এই দুখন ৰে’ল উত্তৰ-পূবত আহি পাব বুলি জনসম্পৰ্কৰক্ষী বিষয়া শুভানন চন্দে জনায়।
