কৰ’না ভাইৰাছৰ বাবে চলি থকা লকডাউনৰ ফলত ৮০শতাংশতকৈয়ো অধিক ভাৰতীয় লোকৰ উপাৰ্জন কমি গৈছে।
আনহাতে, এনে বহু লোক আছে যাৰ বাবে সাহায্য অবিহনে বেছিদিন বৰ্তি থকাটো কঠিন হৈ পৰিব।
চেন্টাৰ ফৰ মনিটৰিং ইণ্ডিয়ান ইক’নমি (চি এম আই ই) নামৰ সংস্থাটোৱে ২৭খন ৰাজ্যত চলোৱা এক সমীক্ষাত এই কথা প্ৰকাশ পাইছে।
সমীক্ষা অনুসৰি, দেশৰ ৮৪শতাংশ লোক মাহে ৩৮০১ টকা উপাৰ্জন কৰে তেওঁলোকৰ উপাৰ্জনত বেয়াকৈ প্ৰভাৱ পৰিছে।
অধ্যয়নকাৰীসকলে লাভ কৰা তথ্য মতে গ্ৰাম্যাঞ্চলত কাম-উপাৰ্জনত আটাইতকৈ বেয়া প্ৰভাৱ পৰিছে। অৱশ্যে, এই অঞ্চলসমূহত কৰ’নাৰ সংক্ৰমণ বহুত কম।
দেসৰ ১৩০ কোটি জনসংখ্যাৰ গৰিষ্ঠ সংখ্যক শ্ৰেণীৰ অৱস্থান শোচনীয় হৈ পৰিছে।
সমীক্ষাটোত দেশৰ ৫৮০০টা পৰিয়ালৰ সৈতে এপ্ৰিল মাহত সমীক্ষা চলোৱা হৈছিল।
য়ুনিভাৰ্ছিটি অফ চিকাগোৰ অৰ্থনীতিৰ অধ্যাপক মাৰীন বোৰ্টেড আৰু চিএমআইইৰ প্ৰধান অৰ্থনীতিবিদ কৌশিক কৃষ্ণনে সমীক্ষাটোৰ তথ্যসমূহ বিশ্লেষণ কৰিছিল।
লকডাউনৰ ফলত দেশৰ পাঁচখন ৰাজ্য আটাইতকৈ অধিক ক্ষতিগ্ৰস্ত হৈছে। ৰাজ্যকেইখন হৈছে ত্ৰিপুৰা, ছত্তীশগড়, বিহাৰ, ঝাৰখণ্ড আৰু হাৰিয়ানা।
সমীক্ষাটোৰ মতে ৩৪ শতাংশ পৰিয়ালে জানিবলৈ দিয়ে যে আন কোনো সাহায্য অবিহনে এসপ্তাহো চলিব নোৱাৰিব।
সমীক্ষা অনুসৰি, উচ্চ হাৰত দৰমহা লাভ কৰা লোকৰ উপাৰ্জন কম হ্ৰাস পাইছে।
কিয়নো স্থায়ী চাকৰি থকা এই লোকসকলে লকডাউনৰ সময়ত ঘৰৰ পৰা কাম কৰাৰ বিকল্প সুযোগ লাভ কৰিছে।
সাধাৰণ উপাৰ্জনৰ লোকৰ ভিতৰত কৃষিৰ লগত জড়িত তথা খাদ্য ব্যৱসায়ৰ সৈতে জড়িত শ্ৰমিকেহে কাম লাভ কৰিবলৈ সক্ষম হৈছে।
চিএমআইইৰ লগতে আন সংস্থাৰ সমীক্ষা অনুসৰি, দেশত ২৫ মাৰ্চৰ লকডাউন ঘোষণা কৰাৰ পাছত এমাহৰ ভিতৰত ১০ কোটি ভাৰতীয়ই সংস্থাপন হেৰুৱাইছে।
