ৰাজ্যৰ বিজেপি চৰকাৰে অসম আৰক্ষীক নিজৰ ৰাজনৈতিক স্বাৰ্থত ব্যৱহাৰ কৰি থকাৰ অভিযোগ আনিছে বিৰোধী দলপতি দেবব্ৰত শইকীয়াই।
শইকীয়াই সংবাদ মাধ্যমলৈ প্ৰেৰণ কৰা এক ভিডিঅ’ বাৰ্টাত অসম আৰক্ষীৰ অপৰাধ অনুসন্ধান বিভাগে থাওৰা সমষ্টিৰ প্ৰাক্তন কংগ্ৰেছী বিধায়ক সুশান্ত বৰগোঁহাইক জেৰা চলোৱা কাৰ্য্যক সমালোচনা কৰি উক্ত অভিযোগ আনে।
শইকীয়াই কয়, ‘আমাৰ দেশ এখন গণতান্ত্ৰিক দেশ। বিৰোধী দলে চৰকাৰক সমালোচনা কৰাৰ সাংবিধানিক অধিকাৰ আছে। এই কথা কেন্দ্ৰ আৰু ৰাজ্যৰ চৰকাৰে যিমান সোনকালে উপলব্ধি কৰিব তেওঁলোকৰ প্ৰতি মংগলদায়ক হ’ব।‘
‘নাগৰিকত্ব সংশোধিত আইনে যিহেতু অসম চুক্তিক উলংঘা কৰে সেয়ে আমাৰ দলে ইয়াৰ প্ৰতিবাদ কৰিছিলো। এই প্ৰতিবাদ অসমৰ স্বাৰ্থত আছিল। ই কেতিয়াও দোষনীয় নহয়।‘ শইকীয়াই কয়।
উল্লেখযোগ্য যে কা বিৰোধী অন্দোলনত জড়িত থকা অভিযোগত কালি অৰ্থাৎ ২০ মে’ত উলুবাৰীস্থিত অসম আৰক্ষীৰ চিআইডিৰ মুখ্য কাৰ্যালয়ত সুশান্ত বৰগোহাঁইক জেৰা চলোৱা হৈছিল।
লগতে পঢ়ক শৃংখল চলিহাৰে সম্পৰ্ক! : দুঘন্টা ধৰি চিআইডিৰ জেৰা প্ৰাক্তন বিধায়ক কংগ্ৰেছী সুশান্ত বৰগোহাঁইক
শইকীয়াই লগতে কয়, ‘চৰকাৰৰ ভূল নীতিক সমালোচনা কৰাৰ বাবেই বিজেপি চৰকাৰে দমনমূলক নীতি গ্ৰহণ কৰি আমাৰ দল আৰু চৰকাৰ বিৰোধী অন্য দলৰ নেতাসকলক জে’ললৈ নিক্ষেপ কৰিবলৈ চেষ্টা চলাই আছে।’
চৰকাৰৰ এই কাৰ্যক অতি দুৰ্ভাগ্যজনক আৰু গণতন্ত্ৰৰ প্ৰতি ভাবুকি আখ্যা দি দলপতি গৰাকীয়ে কংগ্ৰেছ দলে সদায় ৰাইজৰ স্বাৰ্থত মাত মাতি যাব বুলি মন্তব্য কৰে।
‘অসম চৰকাৰক অনুৰোধ জনাম তেওঁলোকে যাতে এনেধৰনৰ কোনো নীতি নলয় যাৰ যোগেদি তেওঁলোকে আমাৰ দেশৰ সংবিধানক, গনতন্ত্ৰক পদাঘাত কৰে৷ শইকীয়াই কয়।
বৰ্তমান অৱস্থাৰ পৰিৱৰ্তন হ’লে পুনৰ ৰাজপথত ‘কা’ বিৰোধী আন্দোলন কৰিম বুলি উল্লেখ কৰি শইকীয়াই সৰ্বানন্দ সোণোৱাল নেতৃত্বাধীন ৰাজ্য চৰকাৰক অসম আৰক্ষীক ৰাজনৈতিক স্বাৰ্থত ব্যৱহাৰ নকৰিবলৈ ‘সকিয়াই’ দিয়ে।
